Ўзбекистон молия вазирининг ўринбосари Одилбек Исоқовнинг АҚШга ташрифи доирасида АҚШ ғазначилигининг Техник ёрдам офиси раҳбари Ларри Макдональд билан учрашув бўлиб ўтди. Бу ҳақда ЎзА хабар берди.
Учрашувда солиқ сиёсати, давлат қарзлари ва инвестицияларни бошқариш тизими, капитал бозорини ривожлантириш, солиқ бошқаруви, шунингдек, бюджет жараёнлари самарадорлигини ошириш соҳасида идоралараро ҳамкорликни ривожлантириш истиқболлари муҳокама қилинди.
Ўзбекистоннинг Вашингтон шаҳридаги элчихонасида бўлиб ўтган учрашув якунида бюджетни режалаштириш, давлат қимматли қоғозлари учун маҳаллий капитал бозорини ривожлантириш ва давлат қарзларини бошқариш амалиётини такомиллаштириш каби соҳаларда молиявий салоҳиятни ривожлантириш дастурларини амалга ошириш бўйича техник топшириқларни имзолаш маросими бўлиб ўтди.
Яқин вақт ичида худди шундай техник топшириқларнинг қимматли қоғозлар ва солиқ бошқаруви соҳаларида ҳам қабул қилиниши кутилмоқда.
Жорий йилнинг ноябрь ойида АҚШ ғазначилиги экспертларининг Ўзбекистонга бир нечта ташрифини ташкил қилиш бўйича келишувга эришилди. Ташрифлар давомида қайд этиб ўтилган соҳаларда ҳамкорлик режалари ишлаб чиқилади. Эксперт гуруҳлар таркибига Ўзбекистон идоралари томонидан узоқ муддатли асосда жалб қилинадиган бўлажак маслаҳатчилар ҳам киради.
Ўзбекистоннинг Вашингтон шаҳридаги элчихонаси томонидан хабар берилишича, АҚШ ғазначилиги 2020 йилнинг бошида Ўзбекистон Молия вазирлиги, Давлат солиқ қўмитаси ва Қимматли қоғозлар бозорини ривожлантириш агентлигига уч нафар маслаҳатчини тайинлашни режалаштирмоқда. Шунингдек, АҚШ ғазначилиги бошқа идоралардан, шу жумладан, Қимматлли қоғозлар комиссияси ва АҚШ биржаларидан экспертларни жалб қилишни кўзламоқда.
Изоҳ (0)