АҚШ президенти Дональд Трамп 9 октябрда Сурияда «Тинчлик булоғи» операцияси бошланиши олдидан Туркия етакчиси Ражаб Тоййиб Эрдўғонга ёзган хатида курдлар генерали Мазлум Абдининг Анқара билан музокаралар олиб боришга тайёр эканлигини билдирган. Бу ҳақда «РИА Новости» хабар берди.

АҚШ давлат раҳбари Эрдўғонга айрим муаммоларнинг ҳал этилиши учун астойдил ҳаракат қилганлигини айтган ва ундан «бутун дунёга ўз юкини ташламаслик»ни сўраган. Икки томон учун ҳам фойдали келишув амалга ошишга яқинлиги, генерал Мазлум ҳам музокараларга тайёр эканлигини қайд этган. Трамп ўз хатига илова сифатида курдлар етакчисининг мактубини ҳам Туркия президентига жўнатган.

Оқ уй матбуот котиби Стефани Гришам Дональд Трампнинг Туркия президентга хат ёзганлиги ҳақиқат эканини тасдиқлаган.

Туркия президенти Ражаб Тоййиб Эрдўғон 9 октябрда Сурия шимоли-шарқида Курдистон ишчи партияси ва ИШИД террорчиларига қарши «Тинчлик булоғи» операциясининг бошланганини эълон қилган. Турк авиацияси шу куни Рас ал-Айн шаҳри ва мамлакатнинг бошқа ҳудудларига ҳаводан ҳужум уюштирган. Кейинчалик турк қўшинлари Сурия ҳудудига бостириб кирган.