Қизил денгизда Саудия Арабистонининг Жидда портига яқин ҳудудда Эрон нефть танкери портлади, деб хабар берди Meduza. Портлаш натижасида юк кемасидаги нефть денгизга тўкилган. Эрон миллий нефть компаниясига қарашли кема экипажининг ҳодиса натижасида талафот кўрмаганлиги хабар қилинмоқда.
Портлаш террорчилар томонидан амалга оширилган деган тахминлар мавжуд, бироқ бу борада ҳали расмий хабарлар берилмаган. Эроннинг PressTV телеканали портлашлар ўртасидаги вақт оралиғи 20 дақиқа бўлгани сабаб, ҳодиса кемага иккита ракета келиб урилиши натижасида содир бўлганини тахмин қилмоқда.
АҚШ Эронни Ҳўрмуз бўғозидаги танкерларга ҳужум уюштирганликда айблаганидан сўнг ушбу портлаш бунга жавобан амалга оширилгани ҳақида хабарлар тарқалган. Расмий Теҳрон ҳодисаларнинг ўзаро алоқадорлигини инкор этди.
Сентябрда Саудия Арабистонидаги Saudi Aramco нефть заводларига дронлар ҳужуми уюштирилиши натижасида мамлакатда нефтни ишлаб чиқариш икки бараварга қисқарганди. Ҳужум бўйича масъулиятни Ямандаги хусий жангарилар ўз зиммасига олган, кейинроқ АҚШ ҳамда Саудия Арабистони ушбу ҳужумлар ортида Эрон турганини билдирган.
Изоҳ (0)