Ижтимоий тармоқларда тарқалган Самарқанд—Қарши трассасида Косон ёқилғи қуйиш шохобчасида транспорт воситасига дизел ёқилғисини қуйиш билан боғлиқ муаммо туғилгани туфайли хорижий туристлар автобусининг 2 соатга кечиктирилгани ҳақидаги хабар юзасидан Энергетика вазирлиги изоҳ берди.
Хабарда Ўзбекистон Туризмни ривожлантириш давлат қўмитаси туристик автобус ушбу АЁҚШ шохобчасига сайёҳлар қўшимча объектларни кўриш истагини билдиргани туфайли келгани қўшимча қилинган. Аммо ҳар қандай ҳолатда сайёҳларга тўлақонли хизматлар кўрсатилиш учун жавобгарлик турни ташкил қилган туристик компания зиммасида эканлиги айтилган.
Шунингдек, 2019 йилнинг сентябрида 45,4 минг тонна дизел ёқилғиси биржага қўйилгани, шундан 14,6 минг тоннаси сотилган, яъни таклиф талабдан ортиқ бўлгани айтилган.
«Бунда қандайдир етказиб берилмаслик ҳақида гап бўлиши мумкин эмас. Мамлакатдаги барча юридик шахслар, шу жумладан, туристик фирмалар ўз эҳтиёжлари учун тўсиқсиз дизел ёқилғисини сотиб олиши мумкин», — дейилади вазирлик хабарида.
Ўзбекистон Республикаси Туризмни ривожлантириш давлат қўмитаси ҳам тегишли туристик ташкилот билан биргаликда ушбу ҳодиса юзасидан батафсил текширув ўтказган.
Қўмита матбуот хизматининг маълум қилишича, хабарда назарда тутилган туристларга «Azim Travel Servis» МЧЖ томонидан хизмат кўрсатилган, автобус ҳам мазкур сайёҳлик ташкилотига тегишли бўлган. Самарқанд—Қарши—Бухоро йўналишида ҳаракатланаётган сайёҳлар ижтимоий тармоқларда келтирилганидек япониялик эмас, аслида хитойлик бўлган.
2 октябрь куни 22 кишидан иборат сайёҳлар гуруҳининг туристик маршрути Термиздан Бухоро шаҳри томон кетаётган бўлган. Хитойлик сайёҳлар гуруҳи қўшимча масканларни кўриш истагини билдиргани боис автобусни бошқараётган ҳайдовчи Косон туманидаги «Файзулло қутлуғ қадам» МЧЖга қарашли АЁҚШда тўхтаган.
«Хитойлик сайёҳлардан юзага келган вақтинчалик ноқулайлик учун ‘Azim Travel Servis’ раҳбарияти томонидан узр сўралган», — дейилади хабарда.
Изоҳ (0)