Фарғонада фирибгар эркак Тошкентдаги беморларнинг хайрия пулларини ўзлаштириб олгани аниқланди

Фарғонанинг Қўқон шаҳрида яшовчи шахс тошкентлик беморларнинг хайрия пулларини ўзлаштириб олгани аниқланди, дея хабар бермоқда «Postda.uz».

Маълум бўлишича, муқаддам судланган М.С. пластик карта билан қандай ишлаш хусусида турли электрон дастурларни ўрганади. Сўнг оғир хасталикка чалинган, даволаниш мақсадида саховатли инсонлар кўмагига умид қилиб банкда ҳисоб рақами очтирган бир неча фуқаронинг рўйхатини тузиб, улар билан телефон орқали суҳбатлашади.

Дастлаб Республика ихтисослаштирилган онкология ва радиология илмий-амалий тиббиёт марказининг Тошкент шаҳар филиалида даволанаётган аёлга телефон қилиб, ёрдам бермоқчилигини айтиб, пластик карта рақамини сўраган. Алдов йўли билан унинг ишончига кирган М.С. бироздан кейин яна қўнғироқ қилиб, пул ўтказишида қандайдир муаммо бўлаётганини, аёлнинг телефонига 4 та рақамдан иборат СМС юбориши, уни қайтиб ўзига айтиб юборишни сўраган.

Аёл телефонига келган смс кодни айтган. М.С эса ўзининг уяли телефони ёрдамида бемор аёлнинг пластик картасига уланиб, ҳисобида 1 миллион 400 минг сўмдан ортиқ пул борлигини аниқлайди ва уни 153 долларга айлантиб, ўзининг электрон ҳамёнига ўтказиб олган.

Шундан сўнг рўйхатдаги бошқа рақам эгалари билан ҳам боғланиб, Тошкент шаҳар Олмазор туманида жойлашган хусусий шифохонада даволанаётган эркакнинг хайриядан йиғилган жами 19 миллион 829 минг сўм пулини 2 163 долларга айлантириб, ўзининг электрон ҳамёнига ўтказган. Бош мия ўсимтаси билан даволанаётган жиянига ёрдам тариқасида келаётган хайрия пулларини йиғаётган эркакнинг ҳам пластик картаси ҳисобидаги жами 9 817 200 сўмни шу йўл билан ўзлаштирган.

Жабрланувчилар зудлик билан ички ишлар органларига мурожаат қилган. Мазкур жиноят иши бўйича терговга қадар суриштирув ишларини олиб борган Тошкент шаҳар ИИББ ЖҚБ тезкор вакили, капитан Бекзод Тиллахўжаев дарҳол Қўқон шаҳрига борган. У ерда М.С.ни тўсатдан учратиб қолган ва хаста кишиларнинг саломатлиги учун йиққан пулларни ўша одамга буюрмаслигини айтиб ўтган.

Эртаси куни эса гумонланувчининг ўзи учта ҳолат бўйича жабрланувчиларнинг пластик картасидаги пулларни ўз ҳисобига ўзлаштириб олганлигини айтиб, қилмишидан пушаймон эканини айтиб, кечирим сўраган. Тергов жараёнида беморлардан олган барча пулларни эгаларига қайтариб берган.

Суд М.С.га жазо тайинлашда унинг айбига иқрорлигини, қилмишидан пушаймонлигини, оилавий аҳволини, жабрланувчиларга етказилган зарар тўлиқ қопланганлигини жазони енгиллаштирувчи ҳолатлар сифатида баҳолаб, унга бир йилу олти ой муддатга озодликдан маҳрум қилиш жазоси тайинлаган.