Япония билан қандай истиқболли лойиҳаларни амалга ошириш режалаштирилган?
7 октябрь куни Ўзбекистон Президенти Шавкат Мирзиёев бошчилигида ўтказилган йиғилишда декабрь ойида амалга ошириладиган Японияга ташриф масалалари муҳокама қилинган эди. Мамлакат раҳбарига 30 дан ортиқ истиқболли инвестиция лойиҳалари тақдим этилган, деб хабар беради «Gazeta.uz».
Тақдим этилган лойиҳалар — Itochu корпорацияси билан ҳамкорликда қишлоқ хўжалиги кластерлари ва иссиқхоналарини яратиш, Sumitomo компанияси билан кимёвий маҳсулотларни ишлаб чиқариш, Mitsubishi билан кўмир электростанцияларини қуриш, Marubeni билан сув таъминоти ва сув тозалаш тизимини модернизация қилиш, Itochu ва Nissan билан ҳамкорликда электробуслар ва енгил автомобилларни ишлаб чиқариш ҳамда Panasonic бренди остида маиший техникаларни ишлаб чиқаришни йўлга қўйиш.
Бундан ташқари ҳозирда Япония билан қиймати 4,7 миллиард долларлик 22 та лойиҳа билан ўзаро келишувларга эришилган:
- Япония халқаро ҳамкорлик агентлиги (JICA) билан боғдорчиликни ривожлантириш учун 200 миллион доллар;
- Kawasaki концерни билан Бухоро, Нукус, Урганч, Фарғона ва Қувасойда технологик когенерация (иссиқлик ва электр энергия ишлаб чиқариш) яратиш;
- 100 миллион долларга JICA билан ҳамкорликда Тошкентдаги Неврология ва инсулт илмий-амалий тиббиёт марказини реконструкция қилиш;
- 1,2 миллиард долларга Mitsubishi билан биргаликда Навоий иссиқлик электр станциясида (ИЭС) учинчи ва тўртинчи буғ-газ қурилмасини қуриш;
- 15 миллион долларга Самарқанд автомобиль заводи (СамАвто) негизида Isuzu D-MAX пикап юк машинасини ишлаб чиқариш.
