7-oktabr kuni O‘zbekiston Prezidenti Shavkat Mirziyoyev boshchiligida o‘tkazilgan yig‘ilishda dekabr oyida amalga oshiriladigan Yaponiyaga tashrif masalalari muhokama qilingan edi. Mamlakat rahbariga 30 dan ortiq istiqbolli investitsiya loyihalari taqdim etilgan, deb xabar beradi “Gazeta.uz”.
Taqdim etilgan loyihalar — Itochu korporatsiyasi bilan hamkorlikda qishloq xo‘jaligi klasterlari va issiqxonalarini yaratish, Sumitomo kompaniyasi bilan kimyoviy mahsulotlarni ishlab chiqarish, Mitsubishi bilan ko‘mir elektrostansiyalarini qurish, Marubeni bilan suv ta’minoti va suv tozalash tizimini modernizatsiya qilish, Itochu va Nissan bilan hamkorlikda elektrobuslar va yengil avtomobillarni ishlab chiqarish hamda Panasonic brendi ostida maishiy texnikalarni ishlab chiqarishni yo‘lga qo‘yish.
Bundan tashqari hozirda Yaponiya bilan qiymati 4,7 milliard dollarlik 22 ta loyiha bilan o‘zaro kelishuvlarga erishilgan:
- Yaponiya xalqaro hamkorlik agentligi (JICA) bilan bog‘dorchilikni rivojlantirish uchun 200 million dollar;
- Kawasaki konserni bilan Buxoro, Nukus, Urganch, Farg‘ona va Quvasoyda texnologik kogeneratsiya (issiqlik va elektr energiya ishlab chiqarish) yaratish;
- 100 million dollarga JICA bilan hamkorlikda Toshkentdagi Nevrologiya va insult ilmiy-amaliy tibbiyot markazini rekonstruktsiya qilish;
- 1,2 milliard dollarga Mitsubishi bilan birgalikda Navoiy issiqlik elektr stantsiyasida (IES) uchinchi va to‘rtinchi bug‘-gaz qurilmasini qurish;
- 15 million dollarga Samarqand avtomobil zavodi (SamAvto) negizida Isuzu D-MAX pikap yuk mashinasini ishlab chiqarish.
Izoh (0)