Франция ҳукумати мамлакат собиқ президенти Жак Ширакнинг вафоти муносабати билан душанба, 30 сентябрь кунини умуммиллий мотам куни деб эълон қилди. Ушбу кунда Париждаги Сен-Сюльпис соборида собиқ президентни ёдга олиш маросими бўлиб ўтади, деб хабар берди «Коммерсантъ».
29 сентябрь куни Елисей саройининг эшиклари барча учун очиқ бўлиб, одамлар мотам китобига ўзларининг ҳамдардликларини ёзиб кетиши мумкин.
Франция собиқ президенти 26 сентябрь куни вафот этди. У 86 ёшда эди.
Жак Ширак 1995—2007 йилларда, икки маротаба Франция президенти бўлган. Бунгача икки бор — 1974—1976 ва 1986—1988 йилларда мамлакат бош вазири бўлган. Иккинчи бош вазирлик муддатини Париж мери лавозими билан бирга ўтказган. У Франция пойтахтини 18 йил давомида бошқарган.
Ширак Иккинчи жаҳон урушида яҳудийларнинг депортация қилинишига Франциянинг дахлдорлигини биринчи бўлиб тан олгани, шунингдек, АҚШнинг Ироққа бостириб киришини қўллаб-қувватлашдан бош тортгани билан танилган. Бундан ташқари, Ширак даврида Франция президентининг ваколат муддати етти йилдан беш йилга камайтирилган.
Изоҳ (0)