Ғузор туманидаги 33-сонли умумий ўрта таълим мактаби яқинда таъмирдан чиқди. Қарийб 2 миллиард сўм маблағ эвазига мукаммал таъмирланиши белгиланган мактабда қурилиш-таъмирлаш ишлари чала ташлаб кетилган. Уларни якунига етказиш учун тумандаги катта заводнинг 30 нафар ишчи-ходими ҳам қурилиш ишларига жалб қилинган. Шундай бўлса-да, мактабнинг бу борадаги муаммолари аримаяпти.
Мактабда бўлиб, ҳолатдан хабар топган «Дарё» мухбирининг ёзишича, таълим маскани «Восток Магнат» МЧЖ қурувчилари томонидан 1 миллиард 989 миллион 180 минг сўм маблағ эвазига 6 ой муддат давомида мукаммал таъмирланиши лозим бўлган.
— Янги ўқув йили бошланган бўлишига қарамасдан ҳалигача синфхоналаримиз ва йўлаклардаги электр симлари очиқ ва ўқувчилар ҳаёти учун хавфли ҳолатда турибди, — дейди мактаб директори Зебо Ғаниева. — Қурилиш ташкилоти раҳбарига буни тушунтиришдан чарчадик.
Аниқланишича, мактаб таъмири инвестиция дастурига киритилган бўлиб, буюртмачи вилоят ҳокимлиги «Ягона буюртмачи хизмати» инжиниринг компанияси бўлса, пудратчи юқорида тилга олганимиз «Восток Магнат» МЧЖ бўлган.
Журналистик кузатувларимизга кўра, 624 ўринга мўлжалланган мактабнинг капитал таъмири чала ташлаб кетилиши баробарида, сифатсиз қурилиш материалларидан ҳам фойдаланилган. Ташқи фасад учун қўлланилган бўёқлар ҳам ҳали ҳеч қанча вақт ўтмасдан кўчиб тушмоқда.
Мактабнинг иситиш тизимини янгилаш учун бошланган хайрли иш фақат қувурларни ўрнатиш билан якунланган. Синфхоналарда ҳатто иситиш батареялари ҳам йўқ.
— Янги ўқув йили бошланганига 20 кундан ортиқ вақт ўтган бўлса-да, спорт зал таъмири чалажон ҳолатда ташлаб кетилган, — дейди таълим маскани раҳбари Зебо Ғаниева. — Мактаб ўқувчилари учун янги ҳожатхона қурилиб, аллақачон ишга тушиши керак эди. Бизда эса ҳали девори ҳам битмаган. Бу ҳақда нафақат туман раҳбарларига, ҳатто республикага ҳам мурожаат қилдим. Аммо натижа чиқмаяпти.
«Балки қурилиш ишлари ҳали якунланмагандир, давом эттиришар», дея берган саволимизга мактаб директори Зебо Ғаниева қурилиш март—апрель ойларида бошланганлиги, август ойида якунига етиши лозимлиги, бироқ 5 сентябрдан буён қурилиш ташкилоти ишчиларидан дарак бўлмаётганини маълум қилди.
Директорнинг айтишича, туман халқ таълими бўлими мудири ҳам куни кеча бўлиб ўтган йиғилишда капитал таъмирланган мактаблар учун тузилган далолатномаларга имзо қўйганини билдирган.
«Восток Магнат» МЧЖнинг айни кундаги раҳбари Улуғбек Чориевнинг «Дарё» мухбирига маълум қилишича, қурилиш ишлари ҳали якунига етмаган, давом этмоқда. Қурилиш-таъмирлаш ишлари ўз вақтида якунига етмай қолиши эса қурилиш ташкилоти раҳбариятининг ўзгариши билан боғлиқ.
Улуғбек Чориевнинг маълумот беришича, «Восток Магнат» МЧЖнинг 33-мактаб таъмирини қабул қилиб олган пайтдаги раҳбари Рустам Саъдуллаев бўлган. Корхона Улуғбек Чориев ихтиёрига 2019 йил июнь ойида ўтган бўлиб, ўша пайтда мактаб таъмирининг 10 фоизигина бажарилган. Аммо асосий маблағ сарфлаб бўлинган.
— Нопок қурувчига дуч келиб қолдик, — дейди «Ягона буюртмачи инжиниринг» компанияси директори Абдусамад Нормўминов. – Берилган маблағларни сарфлаб юбориб, қурилиш ишларини бажармаган. Рустам Саъдуллаев исмли раҳбарни излаб ҳам тополмаймиз. Ҳозирда Улуғбек Чориев билан биргаликда имкониятдан фойдаланиб, ишларни бажаряпмиз.
Абдусамад Нормўминовнинг иқрор бўлишича, мазкур мактаб таъмири «Восток Магнат» МЧЖга Ғузор тумани ҳокимининг аралашуви ҳамда тавсияси билан ҳеч қандай тендерсиз топширилган.
Абдусамад Нормўминов «Дарё» мухбирининг «Восток Магнат» илгари вилоятдаги бирор-бир ижтимоий соҳа объектини қурган ёки мукаммал таъмирдан чиқарганми, нима учун қурилиш объекти ҳеч қандай тендерсиз қурилиш ташкилотига бериб юборилган?», дея берган саволига «Тендер ҳам бўлади», деб жавоб берди.
Суриштирувларимиз давомида қўлимизга тушган яна бир хатдан маълум бўлишича, «Ягона буюртмачи инжиниринг» компанияси директори А.Нормўминов вилоят ҳокими ўринбосари Сирожиддин Азизовни алдаган.
Вилоятдаги қурилишларнинг асосий буюртмачиси бўлган компания директори А.Нормўминовнинг 2019 йил 6 сентябрь куни вилоят ҳокими ўринбосари Сирожиддин Азизовга йўллаган жавоб хатидан англашилишича, мактаб янги ўқув йилига тайёр. Мактаб ҳудудидаги ташқи ҳожатхонанинг сўнгги пардозлаш ва қисман ободонлаштириш ишлари қолган.
Вилоятдаги ижтимоий соҳа объектларининг қурилишига масъул раҳбар вилоят ҳокими ўринбосарини шундай алдаб тургач, унинг мактаб директорига рост гапиришини умид қилмаса ҳам бўлади, назаримизда.
Маълум қилинишича, «Восток Магнат» МЧЖга мактаб ҳожатхонасини қуриш учун берилиши лозим бўлган 278 миллион сўм ҳали тўлаб берилмаган.
— Бу пулни берсак, буниям еб қўйишидан қўрқамиз, — дейди Абдусамад Нормўминов. – Шунинг учун пулни ушлаб турибмиз. Аввал ҳожатхонани битказсин, кейин пулни тўлаб берамиз.
Аниқланишича, мактаб директори қурилиш ишлари сифатсиз ҳамда белгиланган муддатдан кеч қолаётгани боис дастлаб туман халқ таълими бўлими мудирига, сўнгра ҳокимига мурожаат қилган.
Мурожаати ўрганилмагач, директор Бош прокуратура «эшигини қоқади». Бош прокуратурадан 2019 йил 30 август куни вилоят прокурори Ботир Юсуповга йўлланган хатда мурожаатда кўрсатилган барча важлар соҳа мутахассислари жалб қилинган ҳолда вилоят прокуратураси кучи билан тўлиқ ва сифатли ўрганилиши лозимлиги белгиланади. Айни кундаги воқеалардан хулоса қилиш мумкинки, Бош прокуратура томонидан вилоят прокурорига берилган топшириқ қоғозда қолиб кетади.
Мактаб директорининг «Дарё» мухбирига ошкор қилишича, директорнинг янги ўқув йили олдидан қурилиш ишлари тугамай қолаётгани хусусидаги шикоятига жавобан раҳбарият ҳатто тумандаги катта заводлардан бирининг 30 нафар ишчисини мажбурий тартибда қурилиш ишларига жалб қилган. Мажбурий меҳнатга жалб қилинган завод ишчилари эса белгиланган ишни бажаришдан бош тортиб, мактаб директорига эътироз билдирган. Ҳатто уни ҳақоратлаган.
Завод ишчиларининг мактабдаги таъмирлаш ишларига жалб қилинганини қурилиш ташкилоти томонидан мавсумий ишчилар сифатида ёлланган Абдулла Ғойипов, Маъруф Суяров ҳамда Ҳамиджон Нормуродов ҳам тасдиқлади.
Мактаб раҳбариятининг «Дарё» мухбирига қўшимча қилишича, мактаб ошхонасининг қурилиши ҳам ўлда-жўлда қолдирилган. Янги ўқув йили аллақачон бошланган бўлса-да, ошхона қурилиш материаллари ва анжомларини сақлашга яраяпти, холос.
— Мукаммал таъмирдан чиқаётган мактаб ошхонаси учун эски эшик ромлари ўрнатилди, эшик ромлари янги қўйилиши кераклигини айтгандик, бизга аччиқ қилиб ҳатто бошқа ромларни ҳам ўрнатишмай ташлаб кетишди, — дейди Зебо Ғаниева. – Мактабимиз учун бюджетдан қарийб 2 миллиард сўм маблағ берилган. Шунча пул қаерга кетяпти?
Маълум бўлишича, лойиҳада мактаб спорт зали қошида ўқувчилар учун ювиниш хоналари қурилиши ҳам кўзда тутилган бўлса-да, қурилиш ишлари чуқур кавлаш билан тўхтаб қолган.
Муаммони ўрганиш чоғида қурилиш ташкилоти томонидан ёлланма ишчилар сифатида жалб қилинган Абдулла Ғойипов, Маъруф Суяров ҳамда Ҳамиджон Нормуродов «Восток Магнат» МЧЖ раҳбарияти уларни ишчи сифатида жалб қилгани ва бажарилган иш учун хизмат ҳақини тўлиқ бермаётганидан шикоят қилди.
— Қурилиш ташкилоти масъуллари 19 миллион сўм пулимизни «ана бераман, мана бераман» деб 20 кундан бери алдаб юрибди, — дейди Абдулла Ғойипов. — Ваъда қилинган иш бажарилди, аммо ваъда қилинган пул берилмаяпти.
Мактаб раҳбарияти ва қурилиш ташкилотига ёлланма ишчи бўлиб ишлаган ишчиларнинг тахминича, қурилиш ташкилоти катта қарзга ботган.
— Шу боисдан ҳам ҳар сафар пулимизни сўрасак, «ундан қарз олиб келяпман, бундан қарз олиб келяпман» дея нолишади, — дейди Абдулла Ғойипов. — Қурилиш учун берилган пуллар қани десак, «солиқдан қарздорликка ушлаб қолишган», дейишади.
Директор Зебо Ғаниеванинг айтишича, қурилиш ташкилоти катта қарзга ботгани учун ҳам капитал таъмир учун ажратилган маблағ йўққа чиқяпти. Шу боис ҳам энг арзон ва сифатсиз қурилиш материаллари ишлатилган.
— Ҳали қурилишимиз битганига ҳеч қанча вақт бўлгани йўқ, аммо ташқи фасад қисмидаги бўёқлар кўчиб тушяпти, — дейди мактаб директори. — Демак, сифатсиз бўёқ ишлатилган.
Ғузордаги муаммони ўрганиш чоғи кўрган ва эшитганларимизнинг аксарияти қурилишга масъул ташкилотнинг қурилишга уқувсизлигини намоён қилмоқда.
Хўш, бундай масъулиятли вазифани масъулиятсиз қурувчига ишонган раҳбарлар қаерга қарамоқда? Мактаб директори аёл боши билан болалар тақдири учун елиб-югуряпти. Қолган мутасаддилар-чи? Нега томошабин бўлиб туришдан нарига ўтмаяпти? «Ушбу қурувчи ташкилотга биз ишонамиз» дея қурилиш-таъмирлаш ишлари ҳатто тендерсиз бериб юборилишига сабабчи бўлган туман ҳокими нега мум тишлаган?
Саволлар кўп, жавобларни эса масъуллардан кутамиз.
Изоҳ (0)