Президент мактабларида имконияти чекланган ўқувчи-болалар учун ҳам алоҳида шароит яратилган. Бу ҳақда 16 сентябрь куни Тошкент шаҳрида жойлашган Президент мактаби директори Тўрабой Шерматов мактабда бўлиб ўтган медиатурда айтиб ўтди, дея хабар бермоқда «Дарё» мухбири Мусулмонбек Иброҳимов.
Эслатиб ўтамиз, Президент мактаблари Шавкат Мирзиёевнинг 2019 йил 20 февралдаги «Президент мактабларини ташкил этиш тўғрисида»ги қарорига асосан ташкил этилган бўлиб, мамлакатда иқтидорли ёшларни ўқитиш тизимини яратиш ҳамда келгусида уларда раҳбарлик ва етакчилик кўникмаларини шакллантиришга қаратилган.
Илк Президент мактаби Тошкент шаҳрида иш бошлади. Айни пайтда Наманган, Нукус ва Хивада Президент мактабларининг қурилиш ва жиҳозлаш ишлари якунланмоқда.
Президент мактабига кириш имтиҳонлари
Президент мактабларига 2019—2020-ўқув йили учун имтиҳонлар Наманган, Нукус, Хива ва Тошкентда икки босқичда бўлиб ўтган. Дастлаб, саралаш имтиҳонларида қатнашиш учун 28 минг 452 нафар ўқувчи рўйхатдан ўтган. Саралаш босқичи имтиҳони натижаларига кўра, 12 мингга яқин ўқувчи асосий имтиҳонларда иштирок этишни қўлга киритган. Ҳар бир мактабга 144 ўқувчи қабул қилинган (ҳар бир синфда 24 ўқувчи). Синовлар Cambridge Assessment International Education мутахассислари томонидан ўтказилган.
Ўқув жараёни
Президент мактаби интернат сифатида фаолият кўрсатади. Яъни, ўқувчилар 5 кун давомида мактаб ҳудудида (кампусда) яшаб, ўқийди. Ўқувчилар учун барча талабларга жавоб берувчи ётоқхона ташкил этилган. Дам олиш кунлари ота-оналар фарзандларини уйга олиб кетишлари мумкин.
Ўқувчилар бепул мактаб формаси ва овқат билан таъминланади. Ўқув хонасида ҳар бир бола учун алоҳида компьютер ажратилган. Ўқитувчиларга қулай бўлиши учун ўқув хоналарига ҳам электрон, ҳам оддий доска сифатида фойдаланиш имконини берувчи ва қўшимчасига компьютер вазифасини бажарувчи доскалар ўрнатилган.
Ўқув жараёни «STEAM – таълим» дастури (Science — табиий фанлар, Technology — технологиялар, Engineering — техник ижодкорлик, Art — санъат, Mathematics — математика) бўйича олиб борилади. Ушбу йўналишдаги дарслар инглиз тилида ўтади. Айни пайта мактаб STEAM методологияси бўйича дарслик ва ўқув қўлланмалар билан таъминланган.
«STEAM – таълим» дастурига кирувчи дарсларни маҳаллий ва хориждан келган ўқитувчи олиб боради. Маҳаллий ўқитувчи дарс давомида ўқувчилар учун тушунмовчиликлар бўлса, унга ойдинлик киритишга кўмаклашади. Бу ўз навбатида маҳаллий ўқитувчиларни хорижий тажрибага эга мутахассис билан малака алмашинувида ёрдам беради. Болаларнинг қизиқишлари ва хусусиятларига қараб, ўқув жараёнини индивидуализация қилинган ҳолда ўтказиш мумкин.
Канаданинг «Teachaway» ҳамда Буюк Британиянинг «TIC Recruitment» рекрутинг компаниялари билан ҳамкорликда мактабга 30 нафар чет эллик мутахассис танлаб олинган. Шунингдек, 72 нафар тажрибали ва малакали маҳаллий ўқитувчи ҳам жалб этилди. Уларнинг барчаси уч босқичли махсус имтиҳондан ўтказилган. Ўқитувчиларга мактаб ётоқхонасида яшашлари учун алоҳида хоналар ажратилган.
Тошкент шаҳридаги Президент мактабига 2019—2020-ўқув йили учун 5—10-синфга ўқувчилар қабул қилинган. Келгуси ўқув йили учун фақат 5-синфга ўқувчилар қабул қилиш режалаштирилган.
Мактабда она тили ва адабиёти, тарих, география фанлари ўзбек тилида олиб борилади.
Имконияти чекланган ўқувчиларга қулайлик яратиш мақсадида мактаб ҳудудида эркин ҳаракатланиш учун лифт ва алоҳида мослаштирилган ётоқхона хизмати жорий этилган.
Ўқувчиларни жисмоний тарбия машғулотлари билан шуғуллунишларига мини футбол, баскетбол, воллейбол майдони мавжуд. Ёпиқ сузиш ҳавзаси, баскетбол ва воллейбол спорт заллари ўқувчилар ихтиёрида. Мактабнинг умумий майдони 2 гектарни ташкил этади.
Битирувчилар белгиланган тартибда давлат томонидан тасдиқланган шаҳодатнома, аттестат билан бир қаторда, халқаро даражадаги тегишли дастур дипломи (International Baccalaureate, Advanced Placement ёки International Advanced Levels)га эга бўлади. Бу эса ўз навбатида хорижий олий ўқув юртига кириш имконини беради.
Cambridge Assessment International Education вакиллари томонидан маҳаллий ва хорижий мутахассислар учун Cambridge ўқув дастурлари асосида махсус тренинглар ўтказилди.
Президент мактабларининг дастлаб чекланган миқдорда ташкил этилиши ушбу муассасаларни бошқариш учун янги моделни синаб кўриш зарурати билан боғлиқ. Синовдан сўнг, Президент мактаблари 2020 йилда Бухоро, Жиззах, Қашқадарё, Самарқанд ва Фарғона вилоятларида, 2021 йилда Андижон, Навоий, Сурхондарё, Сирдарё ва Тошкент вилоятларида қуриш режалаштирилган.
