Нурафшон шаҳрида 9 сентябрь куни Тошкент вилояти ҳокими вазифасини бажарувчи Рустам Холматов раислигида ўтказилган йиғилишда пахта йиғим-теримини уюшқоқлик билан ўтказиш, бунда ижтимоий соҳа вакилларини теримга жалб қилиш ҳолатига мутлақо йўл қўймаслик юзасидан яна бир бор барча раҳбарлар қатъий огоҳлантирилди.
Фото: Тошкент вилояти ҳокимлиги
«Ҳосилни 10 кун эрта ёки 10 кун кеч йиғиштириб олармиз — буларнинг ҳаммаси бўладиган ишлар. Аммо давлатимизни бутун дунёга шарманда қиладиган хатога йўл қўйишга мутлақо ҳақимиз йўқ. Кимки ўзбошимчалик билан бунга йўл қўйса, ҳозирги сиёсатга хиёнат қилган бўлади», — дея ҳокимнинг сўзларидан иқтибос келтирмоқда вилоят ҳокимлиги матбуот хизмати.
Аввалроқ Сирдарё вилояти ҳокими Ғофуржон Мирзаев вилоятда пахта йиғим-терими мавсумида мажбурий меҳнатга йўл қўйилмаслигини маълум қилган эди. Андижон вилояти ҳокими Шуҳрат Абдураҳмонов эса пахта теримига бирорта бюджет ташкилоти ходимини яқинлаштирмасликка қасам ичган эди. «Ундан кўра, пахта далада қолса қолиб кецин. Қолмайди, албатта. Ҳаммасини терамиз. Лекин бюджет ташкилотлари билан эмас», — деганди Андижон раҳбари.
Маълумот учун, Президент Шавкат Мирзиёев 12 август куни бўлиб ўтган видеоселектор йиғилишида ҳокимларга «бу йил пахта теримига мактаб, институт — умуман, бирорта бюджет ташкилоти ходимлари олиб чиқилмаслиги»ни эслатиб ўтган эди; 13 август куни эса давлат раҳбари тадбиркорларни қишлоқ хўжалигидаги мавсумий ишларга жалб этишни тақиқлашни назарда тутувчи фармонни имзолаган.
