Аввалроқ, Ўзбекистон Мудофаа вазирлиги ҳарбий хизматчилари 16—21 сентябрь кунлари Россияда бўлиб ўтадиган «Марказ – 2019» стратегик қўмондонлик-штаб ўқув машғулотларида иштирок этиши ҳақида хабар берилганди. Ўзбекистонлик ҳарбийлар ушбу ҳарбий стратегик машғулотларда қатнашиш учун Россиянинг Оренбург вилоятидаги «Донгуз» полигонида қад кўтарган вақтинчалик ҳарбий шаҳарчага етиб келиб, ўзлари учун ажратилган чодирларга жойлашди. Бу ҳақда Мудофаа вазирлиги ахборот ва оммавий коммуникациялар департаменти «Дарё»га маълум қилди.
Полигондаги ҳарбий шаҳарчага Ўзбекистон давлат байроғи ўрнатилди.
«Кун тартиби бўйича ҳаракат қилаётган вакилларимиз биринчи куни ўзлари учун ажаратилган ҳудудни кўздан кечириб, дала шароитида яратилган ҳарбий шаҳарча билан танишди. Гуруҳ раҳбарлари томонидан яна бир бор техника хавфсизлик қоидалари эслатиб ўтилди», — дейилади хабарда.
Ўша куни ўзбекистонлик ҳарбий ошпазлар томонидан ўзбек миллий таоми – ош дамланди. Қолган кунлари эса дала шароитида белгиланган таомнома асосида иш кўришади.
Эслатиб ўтамиз, ушбу стратегик қўмондонлик-штаб ўқувларида саккиз мамлакат – Россия, Қозоғистон, Хитой, Покистон, Ҳиндистон, Тожикистон, Қирғизистон ва Ўзбекистоннинг ҳарбий контингенти иштирок этади.
Изоҳ (0)