«Пулни тўлаб қўйинг, ачинмайсиз». Жаҳон футболидаги ўзини оқлаган 5 та трансфер ҳақида

Биз шундай замонда яшаяпмизки, унда Ҳарри Магуайр 90 миллион еврога сотилади. Ўз дарвозасига автоголлар уриб қўядиган Калиду Кулибали эса 200 миллион евродан кам турмайди. Ҳозир эса рекорд даражадаги трансферларни ёдга олмаймиз. Аксинча, дунё футболида мўмайгина пул сарфланган, шу билан ўзини оқлаган футболчилар трансфери ҳақида бироз мулоҳаза юритамиз.

Қайд этиш жоиз, биз ҳам вақтида уларни сотиб олган клубларни ортиқча пул сарфлаганликда айблаб қўйганмиз. Афв этгайсиз, азиз мухлис!

Виржил ван Дейк: «Саутҳэмптон»дан «Ливерпуль»га, 2018 йил — 75 миллион фунт

2018 йилда «Ливерпуль» дунё футбол аҳлини ўзига хос бўлмаган трансфер билан ҳайратга солди. Мерсисайд клуби ҳимоячи Виржил ван Дейк учун 75 миллион фунт тўлади. Аҳмоқона пул сарфлаш бўлганмиди? Кўпчилик кутгандек бўлмади. 1 йил ўтиб, «Ливерпуль» қойилмақом трансферни амалга оширгани маълум бўлди. Нидерландиялик футболчи «қизиллар» ҳимоясини шунчаки кучайтириб қолмади, балки уни буткул ўзгартиришга эришди. Жамоа у келгунга қадар 2016/17 йилги мавсум 42 та гол ўтказган бўлса. Орадан бир йил ўтиб, жамоа битта ўйинда ўртача 1,21 та гол ўтказди. 2018/19 йилги мавсум эса ушбу рақамлар 0,66 фоиз кўрсаткичига тушди. Жамоа бутун мавсум давомида атиги 22 та гол ўтказди ва АПЛ тарихидаги энг яхши иккинчи кўрсаткични қайд этди. Буларнинг ҳаммасига эса Виржил ван Дейк бошчилигидаги ҳимоячилар ва бразилиялик посбон Алиссон сабабчи бўлгани рад этиб бўлмас фактга айланди.

Дидье Дрогба: «Марсель»дан «Челси»га, 2004 йил — 24 миллион фунт

Жозе Моуриньо «Челси»да ишлаган футболчилари билан кейинчалик ҳам биргаликда фаолият олиб борган. Масалан — Рикарду Карвалью. У билан Жозе учта клубда бирга ишлаган. Аммо Жозенинг энг омадли трансферларидан бири, шубҳасиз, Дробга бўлган. Португалиялик мураббий кимни сотиб олаётганини яхши билган ва шу нарса клуб хўжайини Роман Абрамовичга ҳам тушунтира олган. У шу йўсинда иш тутган: «Жаноб Абрамович, пулни тўланг ва ошиқча гапирманг». Аммо Роман Абрамович мураббийнинг ўша вақтда ҳақлигини қабул қилиш осон кечмаган. Боиси 24 миллион фунт ўша вақтда катта пул эди. Дрогба эса 1 йил олдин атиги 3,3 миллион фунтга баҳоланар эди. «Марсель» ивуарлик футболчини сотишни истамаётган, уларга рад этиб бўлмайдиган таклиф бериш керак эди. «Челси» эса 24 миллион фунтни қуртдек санаб берди ва хато қилмади. Дидье клубда 9 мавсумни ўтказди ва жамоанинг ҳақиқий етакчисига айланди.

Дани Алвеш: «Севилья»дан «Барселона»га, 2008 йил — 28,5 миллион фунт

Аввалига Дани Алвешнинг трансфери 23,5 миллион фунт эди. Аммо «Барселона» агар Алвеш клубда муваффақиятли тўп суриб кетадиган бўлса, «Севилья»га яна 5 миллион беришга ваъда берди. Алвеш эса Каталония клуби билан бирга 16 та совринга эга чиқди. Трансфердан эса иккала клуб ҳам бирдек хурсанд бўлди. Ўз вақтида The Telegraph нашри футболчининг «Манчестер Юнайтед» ҳамда «Челси» таклифини рад этгани ва трансфер суммаси ҳаддан ташқари юқори бўлганини танқид остига олганди. Аммо Дани ўз трансферини ортиғи билан оқлади. Кўпчилик шундан сўнг ушбу трансферга бош-қош бўлган Хосеп Гвардиолани айблашга ҳам ботина олмади.

Яя Туре: «Барселона»дан «Манчестер Сити», 2010 йил — 24 миллион фунт

«Ивуарлик — «Сити» сафида ҳафтасига 200 минг фунт оладиган ўртача даражадаги ўйинчи. У гол урадими? Йўқ. Вазиятлар яратадими? Йўқ. Яхши ярим ҳимоячими? Ҳа, аммо де Йонг, Виейра ва Баррининг ўзи клубга етади» — деган энди вақтида таниқли футбол эксперти Пол Мерсон. У ҳатто ушбу трансферга 2 баҳо қўйганди. Ҳозир эса Туре «Сити» тарихидаги энг яхши футболчилардан бири сифатида ёдга олинади.

Кевин де Брюйне: «Вольфсбург»дан «Манчестер Сити»га, 2015 йил — 55 млн фунт

Бельгиялик трансфери амалга оширилган вақтда ҳам Пол Мерсон яна диққат марказида бўлди. Бу сафар у Жефф Стеллинг ҳамда Фил Томпсонлар билан.

Фил: «Де Брюйне… Ё худойим, Жефф. Дунё ақлдан озмоқда. Бундай нарх эвазига ушбу футболчини сотиб олиш ўта кетган ақлсизлик. У яхши ўйинчи, аммо буюк эмас-ку! «Вольфсбург» — яхши жамоа, аммо жин урсин…».

Жефф: «Мерсон, Моуриньо уни бекорга қўйиб юбормагандир-а?»

Мерсон: «Ҳатто бундай деб ўйламайман ҳам. У «Челси»да нимагадир эришиши катта эҳтимол эди. Унинг 50 миллион фунт туришига ҳам ишонмайман. Наҳотки, шунча пул инглиз футболида ўзини кўрсата олмаган бола учун тўланган бўлса?».

Кевин кейин ва ҳозир нималар қилиб ташлаётганини эса кўпчилик ҳайрат билан кузатишда давом этмоқда. Ҳатто Мерсон ҳам.

FourFourTwo материали асосида Асрор Абдуназаров тайёрлади.