Самарқанд тумани «Қайнама» маҳалласи ҳудудида жойлашган Gold invest масъулияти чекланган жамиятига қарашли бўлган пардозлаш ғишт пишириш цехида табиий газдан ноқонуний фойдаланиш ҳолати аниқланди. Бу ҳақда «Дарё»га МИБнинг Самарқанд вилояти бошқармаси хабар берди.
Маълум бўлишича, Gold invest масъулияти чекланган жамияти раҳбари Т.Туранов Самарқанд тумани ҳудудида жойлашган 3-сон саноат зонасига ўтиб кетадиган Пастдарғом тумани аҳолисига табиий газ етказиб бериш учун мўлжалланган 426 диаметрли қувурга 20 диаметрли шланг орқали ноқонуний уланиб олган.
Самарқанд вилояти бўйича газ таъминоти ҳудудий филиали томонидан тақдим қилинган хулосага кўра, оқибатда давлатга 99 миллион 367 минг сўм зарар етказилган.
Т.Туранов етказилган зарарни бартараф этиб, зарарни тўлиқ қоплаб берган.
Изоҳ (0)