Давлат бошқаруви соҳасидаги мутахассис Азиза Умарова Олий Мажлис Қонунчилик палатаси депутатлиги учун сайловда иштирок этмасликка қарор қилди. Бу ҳақда унинг ўзи ижтимоий тармоқлардаги саҳифаларида баён қилди.
«Менда сиёсатга ўта берилиб кетишлик, сиёсатпарастлик йўқ. Шунингдек, депутат бўлиш ниятим ҳам йўқ, чунки номзодлар борасида олдинги сайловларга нисбатан жиддий силжишлар бўлишига ишончим комил эмас. Сизлар қатори мен ҳам умрим давомида ўзим сайлаган бирорта депутатни билмаганман, юзма-юз келмаганман, нима бўлибди, яшаяпмиз-ку!», — деган у.
Азиза Умарованинг айтишича, ўтган ойлар мобайнида партия ҳали бирор бир йиғилишига чақиргани йўқ. Номзодларнинг тайинланиш жараёни мавҳум. Маълумот тўплаш ва ахборот ҳужумлари тушунарсиз бўлмоқда. Буларнинг барчаси беҳуда нарсалар.
«Умид билдираманки, ҳеч бўлмаганда бир нечта муносиб фаол инсонларга имкон берилади. Масалан, Кушербаев кабиларга. Ҳеч бўлмаганда 10 нафар шундай инсонга йўл очилганда эди...», — дея қўшимча қилган у.
Шунингдек, бўлажак депутатлардан ижтимоий ҳимоя, қишлоқ хўжалиги ва таълим борасидаги ислоҳотларга эътибор беришни сўраган.
Изоҳ (0)