Европада трансфер ойнаси ёпилди. Сўнгги кунда қандай трансферлар амалга оширилди?

Европа миллий чемпионатларида 2 сентябрь, сешанба куни ёзги трансферлар ойнаси ёпилди. «Дарё» трансфер ойнасининг сўнгги кунида амалга оширилган трансферларнинг энг муҳимларини битта саҳифга жойлади.

Реал» дарвозабони Кейлор Навас ПСЖ футболчисига айланди. 32 ёшли Навас парижликлар билан 2023 йилнинг ёзига қадар мўлжалланган битим имзолади. Ўз навбатида қарама-қарши йўналишда, ПСЖ посбони Алфонс Ареоля «Реал» сафига келиб қўшилди. Франция терма жамоаси посбони мадридликлар сафида бир йил ижарада ўйнайди.

«Интер» ҳужумчиси Мауро Икарди фаолиятини ПСЖда давом эттиради. 26 ёшли аргентиналик футболчи миланликлар билан 2022 йилга қадар мўлжалланган шартнома имзолади ва Парижга ижара асосида йўл олди. Икарди янги жамоасида йилига 8 миллион евро маош олади. ПСЖда футболчини 70 миллион еврога сотиб олиш ҳуқуқи бўлади. Шунингдек, ПСЖ ҳужумчиси Хесе Родригесни Лиссабонннинг «Спортинг»ига ижарага бериб юборди.

«Ливерпуль» ҳужумчиси Бобби Данкан «Фиорентина» футболчисига айланди. «Қизиллар» собиқ футболчиси Стивен Жеррарднинг жияни Италия клуби билан уч йиллик шартнома имзолади. Флоренцияликлар «Флуминенсе» клубида тўп суриб келган ҳужумчи Педрони ҳам ўз сафига қўшиб олди.

«Барселона» ҳам трансфер ойнасининг сўнгги кунида фаол бўлди. «Барселона» ярим ҳимоячиси Рафинья Алькантара «Сельта»га ижара асосида йўл олди. «Кўк-анорранглилар» футболчи билан шартномани 2021 йилга қадар узайтирган.

Каталон клуби «Лас-Палмас» ярим ҳимоячиси Педри трансферини эълон қилди. 16 ёшли футболчи «Барселона» билан «2+2» кўринишидаги шартнома имзолаган ва 2020 йилнинг ёзида жамоага келиб қўшилади.

«Рома» клуби «Атлетико» ҳужумчиси Никола Калинични ижарага олди. Римликлар клубида хорватиялик футболчини 9 миллион еврога сотиб олиш ҳуқуқи бўлади.

Шунингдек, «бўрилар» «Арсенал» ярим ҳимоячиси Генрих Мхитарянни ҳам ижара асосида ўз сафига қўшиб олди. 30 ёшли арманистонлик футболчининг ижараси учун 3 миллион евро тўлайди.

«Рома» ҳужумчиси Патрик Шик эса «Лейпциг»га ижарага берилди. Немис клуби бир йиллик ижара учун 3,5 миллион евро тўлайди. Шунингдек, «бўрилар»да футболчини 29 миллионга сотиб олиш ҳуқуқи бўлади.

Словакиялик ҳимоячи Мартин Шкртел «Итанбул Башакшеҳир»га ўтди. Соғлиғидаги муаммолар туфайли «Аталанта» билан шартномасини бекор қилган футболчи турк клуби билан бир йиллик келишув имзолади.

«Милан» ярим ҳимоячи Ален Ҳалиловични «Ҳеренвен»га ижарага берди. Ўтган мавсумни «Стандард»да ўтказган 23 ёшли хорватиялик футболчи Нидерландия клубида бир мавсум ҳаракат қилади.

Миланликлар клуби «Айнтрахт» ҳужумчиси Анте Ребични икки йилга ижарага олди. Қарама-қарши йўналишда «Милан» форварди Андре Сильва франкфуртликлар сафига йўл олган. Сильва ҳам икки йил ижарада ўйнайди.

«Севилья» мексикалик ҳужумчи Хавьер Эрнандесни «Вест Ҳэм»дан сотиб олди. Чичарито испан клуби билан уч йиллик шартнома имзолаган.

Туркиянинг «Галатасарой» жамоаси «Монако» ҳужумчиси Радамель Фалькао билан 3 йиллик шартнома имзолади. 33 ёшли ўйинчининг трансфери истанбулликларга текинга тушди. Фалкао янги жамоасида йилига 5 миллион евро маош олади.

«Галатасарой» шунингдек, «Саутҳэмптон» ярим ҳимоячиси Марио Лемина ва «Брайтон» ҳужумчиси Флорин Андонени ижарага олди.