Аввалроқ, Ўзбекистон Қуролли Кучлари академияси ташаббуси билан Тошкент шаҳри кўчалари бўйлаб «Биз соғлом турмуш тарафдоримиз» шиори остида 5 километрлик марафон ўтказилиши ҳақида хабар берилганди. Бугун, 3 сентябрь куни эрта тонгда бошланган мазкур марафон якунига етди. Бу ҳақда Мудофаа вазирлиги Ахборот ва оммавий коммуникациялар департаменти «Дарё»га маълум қилди.
Эрта тонгдан Қуролли Кучлар академияси саф майдони академия шахсий таркиби, офицерлар, сержантлар, ҳарбий пенсионерлар, курсантлар, турли ташкилот ҳамда вазирликлардан ташриф буюрган меҳмонлар ва пойтахтнинг спортга бефарқ бўлмаган кўнгилли фуқаролари билан тўлди.
Марафон иштирокчилари Қуролли Кучлар академиясидан старт олиб, Кичик халқа йўли – Тараққиёт кўчаси – «Ашхобод сайилгоҳи» истироҳат боғи – Мирзо Улуғбек шоҳ кўчаси ва Паркент кўчаси орқали академиядаги финишга етиб келди.
Байрамона кайфиятда бўлиб ўтган марафонда Ўзбекистон Президенти ҳузуридаги Хавфсизлик кенгаши котиби Виктор Маҳмудов ва Мудофаа вазири ўринбосари генерал майор Азизбек Икрамов ҳам фаол иштирок этди.
«Барча қатнашчиларни, аввало, она Ватанимизнинг истиқлол байрами билан чин қалбимдан табриклайман. Мана шундай спорт тадбирларида фаол иштирок этиб келаётган ҳарбий хизматчилар, пенсионерлар ва кўнгилли фуқароларга ўз миннатдорлигимни билдираман», – деди генерал майор Азизбек Икрамов.
Марафон сўнгида йўналишлар бўйича аниқланган ғолиб ва совриндорларга диплом ва эсдалик совғалари берилди.
Изоҳ (0)