«Чарм тўп—2019» мусобақасининг дастлабки ғолиби маълум бўлди

Маҳалла ёшлари ўртасида ўтказилган «Чарм тўп—2019» анъанавий футбол мусобақаси ўз ниҳоясига етди.

28 август, чоршанба куни Тошкентаги «Миллий» стадионида мусобақнинг финал учрашуви бўлиб ўтди. Унда Тошкент шаҳрининг «Иқбол» ва Навоий вилояти Навбаҳор туманининг «Келачи» жамоалари ғолиблик учун кураш олиб борди. Учрашувни Ўзбекистон футбол Ассоциацияси биринчи вице-президенти Равшан Эрматов бошқариб борди.

Учрашувнинг асосий вақтида ҳисоб очилмади, пенальтилар сериясида эса омад пойтахтликларга кулиб боқди. Шу тариқа, Тошкент шаҳри Бектемир туманининг «Иқбол» жамоаси чемпионликни қўлга киритди.

Шунингдек, финалдан аввал Қашқадарёнинг «Оққамиш» ва Наманганнинг «Навкент» жамоалари учинчи ўрин учун баҳс оллиб борди. Унда наманганликлар иродали ғалабани қўлга киритди (3:2).

Мусобақа ғолиблари ва иштирокчи жамоаларни тақдирлаш маросимида Ўзбекистон Республикаси Жисмоний тарбия ва спорт вазири Дилмурод Набиев, Ўзбекистон Миллий олимпия қўмитаси президенти Рустам Шоабдураҳмонов, Жисмоний тарбия ва спорт вазирининг биринчи ўринбосари Ойбек Қосимов, вазир ўринбосари Шариф Мўминжонов ва бошқалар иштирок этди.

Финал баҳсидан кейин мусобақанинг индивидуал совриндорлари аниқланди:

• «Энг яхши дарвозабон» — Бекзод Амануллаев («Иқбол», Тошкент шаҳар)
• «Энг яхши ҳимоячи» — Зуҳриддин Муродиллаев («Келачи», Навоий)
• «Энг яхши ярим ҳимоячи» — Шуҳрат Исганов («Навкент», Наманган)
• «Энг яхши ҳужумчи» — Санжар Алиқулов («Еттигузар», Сирдарё)
• «Энг яхши футболчи» — Суннатилла Тошпўлатов («Келачи», Навоий)
• «Энг яхши мураббий» — Аҳмаджон Холмирзаев («Навкент», Наманган)