Дунёдаги кўплаб олий таълим муассасаларини турли нашрлар, илмий тадқиқот марказлари ва бошқа манбалар ҳар йили турли йўналишлар бўйича баҳолаб боради.
Буюк Британиянинг нуфузли Times Higher Education World University Rankings (THE) нашри ҳам ана шундай дунё ОТМ фаолиятини баҳолайдиган ва рейтингларини тузадиган нашр ҳисобланади. Ушбу нашр ҳар йили дунё ОТМлар рейтингини тузади ва унинг рейтинги ҳам дунёдаги нуфузли рейтинглардан бири ҳисобланади.
Times Higher Education World University Rankings томонидан эълон қилинган рейтингда дунёнинг 86 мамлакатидан 1250 ОТМ ўрин олган.
Times Higher Education ҳар йили дунёнинг энг кучли ОТМларини рейтингини тузиб келадиган нуфузли нашр ҳисобланади. Нашр дунёдаги кўплаб ОТМнинг иш фаолиятини доимий кузатиб боради.
Ушбу рейтингни тузишда мукаммал баҳолаш учун нашр ОТМларни 13 та кўрсаткич бўйича баҳолайди. Улар бешта йўналишга бўлинган. Булар:
- ўқув (ўқув муҳити);
- тадқиқот (ҳажм, даромад, обрў);
- иқтибос (тадқиқот таъсири);
- халқаро таъсир;
- ишлаб чиқариш фаолиятидан олинган даромад (билимларни узатиш).
Рейтинги ҳар йили Times Higher Education Magazine журналида эълон қилиб борилади.
Қуйида ушбу нашр томонидан эълон қилинган 2019 йилнинг энг нуфузли ОТМлари рейтинги билан таништирамиз.
10. Чикаго университети, АҚШ
Чикаго университети, номидан ҳам маълум, Иллинойс штатида, Чикаго шаҳрида жойлашган. У 1890 йилда ташкил этилган.
Университет дунёдаги нуфузли олийгоҳлардан бири ҳисобланади.
Университетда турли фанлардан чуқур билим берадиган коллежлар, аспирантуралар ва юксак даражада таълим берадиган олтита институт бор.
Университетда Прицкер номидаги тиббиёт мактаби, Бут номидаги бизнес мактаби, ҳуқуқшунослик институти, Харрис номидаги давлат сиёсати мактаблари бор.
Университет дунёнинг кўплаб бошқа рейтингларда ҳам юқори ўринларни эгаллайди.
Университетда 17 мингга яқин талаба бакалавр ва магистрлик дипломи учун таҳсил олади.
9. Лондон империя коллежи, Буюк Британия
Лондон империя коллежи шаҳарнинг Жанубий Кенсингтон мавзесида жойлашган олий таълим муассасаси ҳисобланади.
Лондон империя коллежи Оксфорд ва Кембриж университетлари билан бирга «Олтин учбурчак» деб аталади. Ушбу ОТМ дунёнинг энг нуфузли олийгоҳларидан бири ҳисобланади.
ОТМда муҳандислик, тиббиёт ва бизнес соҳасида етук мутахассислар тайёрланади. У ҳам анаънавий тарзда ҳар йили дунёнинг энг нуфузли ОТМ рейтингларида юқори ўринларни эгаллаб келмоқда.
ОТМда 15 мингга яқин талаба бакалавр ва магистрлик дипломи учун таҳсил олади.
8. Йель университети
Йель университети дунёдаги энг нуфузли университетлардан бири ҳисобланади. У Коннектикут штатидаги Нью-Хейвен шаҳарчасида жойлашган.
Йель университети ҳам Принстон университети каби асосан илмий тадқиқотларга асосланган йўналишлар бўйича етук мутахассислар тайёрлайди.
Йель университети Гарвард ва Принстон университетлари билан биргаликда «Катта учлик» деб аталади.
Университет таркибида 12 та йўналиш, Йель коллежи, аспирантура ва гуманитар фанлар, юриспруденция, тиббиёт, атроф-муҳитни асраш ва бизнес йўналишлари каби турли мутахассисликлар бўйича ўқитадиган ўнта факультет бор.
Университетда 13 мингга яқин талаба бакалавр ва магистрлик дипломи учун таҳсил олади.
7. Принстон университети, АҚШ
Принстон университети АҚШдаги кўҳна университетлардан бири ҳисобланади. У нафақат АҚШдаги, балки дунёдаги обрўли университетлардан биридир.
Принстон университетида гуманитар, ижтимоий ва техника фанлари бўйича бакалавр ва магистрлар тайёрланади.
Университетда Вудро Вильсон номидаги халқаро муносабатлар мактаби бор. Мактабда муҳандислик ва унга тегишли фанлардан чуқур билимлар берилади. Шунингдек, бу ерда меъморчилик чуқур ўқитиладиган мактаб ҳам бор.
Университетда 8 мингдан ошиқ талаба бакалавр ва магистрлик дипломи учун таҳсил олади.
6. Гарвард университети, АҚШ
Гарвард университети нафақат АҚШдаги, дунёдаги энг нуфузли университетлардан бири ҳисобланади. Шунингдек, бу университет АҚШдаги энг биринчи очилган университетдир.
Бу университет ҳам Массачусетс штатида, Бостон шаҳри яқинидаги Кембриж шаҳарчасида жойлашган. Олийгоҳ битирувчилари, тингловчилари ва ўқитувчилари орасидан 75 нафар Нобель мукофоти совриндори етишиб чиққан.
Гарвард университети нафақат АҚШдаги, балки дунёдаги битирувчилари орасидан энг кўп миллиадер етишиб чиққан университет ҳисобланади. Унинг кутубхонаси таълим муассасалари кутубхоналари орасида энг йирик, АҚШ кутубхоналари орасида эса учинчи ўринда турадиган кутубхона ҳисобланади.
Университетда 25 мингга яқин талаба бакалавр ва магистрлик дипломи учун таҳсил олади.
5. Калифорния технология университети, АҚШ
Калифорния технология университети Калифорния штатида, Пасадина шаҳарчасида жойлашган. Бу университет АҚШдаги энг нуфузли ОТМларидан бири ҳисобланади ҳамда Массачусетс технология институти билан биргаликда аниқ фанлар ва технологиялар соҳасида етук мутахассислар тайёрлайдиган энг нуфузли университет саналади.
Шунингдек, университетда реактив ҳаракатлар лабораторияси мавжуд бўлиб, NASA’нинг космик аппаратлари учун эҳтиёт қисмлар ишлаб чиқаради.
Ушбу университет битирувчилари, тингловчилари ва ўқитувчилари орасидан 31 нафар Нобель мукофоти совриндори чиққан.
Университетда 2 500 га яқин талаба бакалавр ва магистрлик дипломи учун таҳсил олади.
4. Массачусетс технология институти, АҚШ
Ушбу олий таълим даргоҳи Массачусетс технология институти деб номланса-да, аслида у университет ҳисобланади. У Массачусетс штатида, Бостон шаҳри яқинидаги Кембриж шаҳарчасида жойлашган.
Массачусетс технология институти дунёнинг кўплаб рейтингларида юқори ўринларда туради. Айниқса робототехника, дастурлаш, ахборот технологиялари, иқтисодиёт, физика, кимё, математика ва бошқа соҳаларда етук мутахассислар чиқариши билан донг таратган.
Шунингдек, у менежмент, иқтисодиёт, лингвистика, сиёсий фанлар ва фалсафа соҳалари бўйича ҳам етук мутахассислар тайёрлайди.
Университетда 12 мингга яқин талаба бакалавр ва магистрлик дипломи учун таҳсил олади.
3. Стенфорд университети, АҚШ
Стенфорд университети нафақат АҚШдаги, балки дунёдаги энг нуфузли университетлардан бири ҳисобланади. У Сан-Франсискодан 60 километр жанубдаги Пало-Альто шаҳарчасида жойлашган.
Университетнинг юридик, тиббиёт, техника, мусиқа ва бошқа кўплаб соҳаларда етук мутахассислар тайёрлайдиган турли факультетлари бор. Унинг таркибида бир нечта махсус олий мактаб ва илмий-текшириш марказлари бор.
Университет дунёнинг кўплаб бошқа рейтингларида ҳам доим юқори ўринларни эгаллаб келади.
Hewlett-Packard, Electronic Arts, Sun Microsystems, Nvidia, Yahoo!, Cisco Systems, Silicon Graphics, Google каби дунёга машҳур компания ва корпорацияларни ушбу университет битирувчилари очган ва катта муваффақиятларга эришган.
Университетда 17 мингга яқин талаба бакалавр ва магистрлик дипломи учун таҳсил олади.
2. Кембриж университети, Буюк Британия
Кембриж университети Буюк Британиядаги Оксфорд университетидан кейинги энг қадимий университет ҳисобланади. Шунингдек у мамлакатдаги Оксфорд университетидан кейин иккинчи ўринда турувчи энг йирик олийгоҳдир.
Кембрижда ўқув машғулотлар, талабалар ва аспирантларнинг илмий ишлари умумий сони олтита бўлган университет «мактаб»ларида олиб борилади
Ҳар бир мактабнинг бошқарув администрацияси, бир нечтадан факультети, илмий-текшириш институтлари, лабораториялари бор.
Кембриж университетига алоқадор, битирувчилар, тингловчилар ва ўқитувчилар Нобель мукофоти олиш бўйича дунёда биринчи ўринда туради. Ушбу университетнинг 88 битирувчи ва тингловчилари ва ўқитувчилари ушбу нуфузли мукофотни қўлга киритган.
Ушбу университетда 20 мингга яқин талаба бакалавр ва магистрлик дипломи учун таҳсил олади. Уларнинг 34 фоизи хорижлик талабалардир. Кембрижда 8 минг ўқитувчи ишлайди.
1. Оксфорд университети, Буюк Британия
Мана уч йилдирки, Оксфорд университети ушбу рейтингда биринчи ўринни ҳеч кимга бермай келяпти. Тадқиқотлар билан шуғулланиш кўлами, тадқиқотлар сони, тадқиқотларнинг муваффақиятли чиқиши ва яна бир қатор кўрсаткичлар бўйича ушбу университет бир неча йилдан бери энг юқори натижаларни кўрсатяпти.
Оксфорд университети Буюк Британиядаги энг йирик ва энг қадимий олийгоҳ саналади. Умумий ҳисобда ушбу рейтингдан Буюк Британиянинг 24 та нуфузли ОТМлари ўрин олган.
Оксфордда таълим олиш пуллик ва у бу йўналишда дунёдаги энг қиммат ОТМ ҳисобланади.
Шунингдек, Оксфорд дунёдаги кўплаб бошқа рейтингларда ҳам энг юқори ўринлардан бирини эгаллайди.
Университетда 20 мингга яқин талаба бакалавр ва магистрлик дипломи учун таҳсил олади.
Изоҳ (0)