Dunyodagi ko‘plab oliy ta’lim muassasalarini turli nashrlar, ilmiy tadqiqot markazlari va boshqa manbalar har yili turli yo‘nalishlar bo‘yicha baholab boradi.
Buyuk Britaniyaning nufuzli Times Higher Education World University Rankings (THE) nashri ham ana shunday dunyo OTM faoliyatini baholaydigan va reytinglarini tuzadigan nashr hisoblanadi. Ushbu nashr har yili dunyo OTMlar reytingini tuzadi va uning reytingi ham dunyodagi nufuzli reytinglardan biri hisoblanadi.
Times Higher Education World University Rankings tomonidan e’lon qilingan reytingda dunyoning 86 mamlakatidan 1250 OTM o‘rin olgan.
Times Higher Education har yili dunyoning eng kuchli OTMlarini reytingini tuzib keladigan nufuzli nashr hisoblanadi. Nashr dunyodagi ko‘plab OTMning ish faoliyatlarini doimiy kuzatib boradi.
Ushbu reytingni tuzishda mukammal baholash uchun nashr OTMlarni 13 ta ko‘rsatkich bo‘yicha baholaydi. Ular beshta yo‘nalishga bo‘lingan. Bular:
- o‘quv (o‘quv muhiti);
- tadqiqot (hajm, daromad, obro‘);
- iqtibos (tadqiqot ta’siri);
- xalqaro ta’sir;
- ishlab chiqarish faoliyatidan olingan daromad (bilimlarni uzatish).
Reytingi har yili Times Higher Education Magazine jurnalida e’lon qilib boriladi.
Quyida ushbu nashr tomonidan e’lon qilingan 2019-yilning eng nufuzli OTMlari reytingi bilan tanishtiramiz.
10. Chikago universiteti, AQSh
Chikago universiteti, nomidan ham ma’lum, Illinoys shtatida, Chikago shahrida joylashgan. U 1890-yilda tashkil etilgan.
Universitet dunyodagi nufuzli oliygohlardan biri hisoblanadi.
Universitetda turli fanlardan chuqur bilim beradigan kollejlar, aspiranturalar va yuksak darajada ta’lim beradigan oltita institut bor.
Universitetda Pritsker nomidagi tibbiyot maktabi, But nomidagi biznes maktabi, huquqshunoslik instituti, Xarris nomidagi davlat siyosati maktablari bor.
Universitet dunyoning ko‘plab boshqa reytinglarda ham yuqori o‘rinlarni egallaydi.
Universitetda 17 mingga yaqin talaba bakalavr va magistrlik diplomi uchun tahsil oladi.
9. London imperiya kolleji, Buyuk Britaniya
London imperiya kolleji shaharning Janubiy Kensington mavzesida joylashgan oliy ta’lim muassasasi hisoblanadi.
London imperiya kolleji Oksford va Kembrij universitetlari bilan birga “Oltin uchburchak” deb ataladi. Ushbu OTM dunyoning eng nufuzli oliygohlaridan biri hisoblanadi.
OTMda muhandislik, tibbiyot va biznes sohasida yetuk mutaxassislar tayyorlanadi. U ham ana’naviy tarzda har yili dunyoning eng nufuzli OTM reytinglarida yuqori o‘rinlarni egallab kelmoqda.
OTMda 15 mingga yaqin talaba bakalavr va magistrlik diplomi uchun tahsil oladi.
8. Yel universiteti
Yel universiteti dunyodagi eng nufuzli universitetlardan biri hisoblanadi. U Konnektikut shtatidagi Nyu-Xeyven shaharchasida joylashgan.
Yel universiteti ham Prinston universiteti kabi asosan ilmiy tadqiqotlarga asoslangan yo‘nalishlar bo‘yicha yetuk mutaxassislar tayyorlaydi.
Yel universiteti Garvard va Prinston universitetlari bilan birgalikda “Katta uchlik” deb ataladi.
Universitet tarkibida 12 ta yo‘nalish, Yel kolleji, aspirantura va gumanitar fanlar, yurisprudensiya, tibbiyot, atrof-muhitni asrash va biznes yo‘nalishlari kabi turli mutaxassisliklar bo‘yicha o‘qitadigan o‘nta fakultet bor.
Universitetda 13 mingga yaqin talaba bakalavr va magistrlik diplomi uchun tahsil oladi.
7. Prinston universiteti, AQSh
Prinston universiteti AQShdagi ko‘hna universitetlardan biri hisoblanadi. U nafaqat AQShdagi, balki dunyodagi obro‘li universitetlardan biridir.
Prinston universitetida gumanitar, ijtimoiy va texnika fanlari bo‘yicha bakalavr va magistrlar tayyorlanadi.
Universitetda Vudro Vilson nomidagi xalqaro munosabatlar maktabi bor. Maktabda muhandislik va unga tegishli fanlardan chuqur bilimlar beriladi. Shuningdek, bu yerda me’morchilik chuqur o‘qitiladigan maktab ham bor.
Universitetda 8 mingdan oshiq talaba bakalavr va magistrlik diplomi uchun tahsil oladi.
6. Garvard universiteti, AQSh
Garvard universiteti nafaqat AQShdagi, dunyodagi eng nufuzli universitetlardan biri hisoblanadi. Shuningdek, bu universitet AQShdagi eng birinchi ochilgan universitetdir.
Bu universitet ham Massachusets shtatida, Boston shahri yaqinidagi Kembrij shaharchasida joylashgan. Oliygoh bitiruvchilari, tinglovchilari va o‘qituvchilari orasidan 75 nafar Nobel mukofoti sovrindori yetishib chiqqan.
Garvard universiteti nafaqat AQShdagi, balki dunyodagi bitiruvchilari orasidan eng ko‘p milliader yetishib chiqqan universitet hisoblanadi. Uning kutubxonasi ta’lim muassasalari kutubxonalari orasida eng yirik, AQSh kutubxonalari orasida esa uchinchi o‘rinda turadigan kutubxona hisoblanadi.
Universitetda 25 mingga yaqin talaba bakalavr va magistrlik diplomi uchun tahsil oladi.
5. Kaliforniya texnologiya universiteti, AQSh
Kaliforniya texnologiya universiteti Kaliforniya shtatida, Pasadina shaharchasida joylashgan. Bu universitet AQShdagi eng nufuzli OTMlaridan biri hisoblanadi hamda Massachusets texnologiya instituti bilan birgalikda aniq fanlar va texnologiyalar sohasida yetuk mutaxassislar tayyorlaydigan eng nufuzli universitet sanaladi.
Shuningdek, universitetda reaktiv harakatlar laboratoriyasi mavjud bo‘lib, NASAning kosmik apparatlari uchun ehtiyot qismlar ishlab chiqaradi.
Ushbu universitet bitiruvchilari, tinglovchilari va o‘qituvchilari orasidan 31 nafar Nobel mukofoti sovrindori chiqqan.
Universitetda 2 500 ga yaqin talaba bakalavr va magistrlik diplomi uchun tahsil oladi.
4. Massachusets texnologiya instituti, AQSh
Ushbu oliy ta’lim dargohi Massachusets texnologiya instituti deb nomlansa-da, aslida u universitet hisoblanadi. U Massachusets shtatida, Boston shahri yaqinidagi Kembrij shaharchasida joylashgan.
Massachusets texnologiya instituti dunyoning ko‘plab reytinglarida yuqori o‘rinlarda turadi. Ayniqsa robototexnika, dasturlash, axborot texnologiyalari, iqtisodiyot, fizika, kimyo, matematika va boshqa sohalarda yetuk mutaxassislar chiqarishi bilan dong taratgan.
Shuningdek, u menejment, iqtisodiyot, lingvistika, siyosiy fanlar va falsafa sohalari bo‘yicha ham yetuk mutaxassislar tayyorlaydi.
Universitetda 12 mingga yaqin talaba bakalavr va magistrlik diplomi uchun tahsil oladi.
3. Stenford universiteti, AQSh
Stenford universiteti nafaqat AQShdagi, balki dunyodagi eng nufuzli universitetlardan biri hisoblanadi. U San-Fransiskodan 60 kilometr janubdagi Palo-Alto shaharchasida joylashgan.
Universitetning yuridik, tibbiyot, texnika, musiqa va boshqa ko‘plab sohalarda yetuk mutaxassislar tayyorlaydigan turli fakultetlari bor. Uning tarkibida bir nechta maxsus oliy maktab va ilmiy-tekshirish markazlari bor.
Universitet dunyoning ko‘plab boshqa reytinglarida ham doim yuqori o‘rinlarni egallab keladi.
Hewlett-Packard, Electronic Arts, Sun Microsystems, Nvidia, Yahoo!, Cisco Systems, Silicon Graphics, Google kabi dunyoga mashhur kompaniya va korporatsiyalarni ushbu universitet bitiruvchilari ochgan va katta muvaffaqiyatlarga erishgan.
Universitetda 17 mingga yaqin talaba bakalavr va magistrlik diplomi uchun tahsil oladi.
2. Kembrij universiteti, Buyuk Britaniya
Kembrij universiteti Buyuk Britaniyadagi Oksford universitetidan keyingi eng qadimiy universitet hisoblanadi. Shuningdek u mamlakatdagi Oksford universitetidan keyin ikkinchi o‘rinda turuvchi eng yirik oliygohdir.
Kembrijda o‘quv mashg‘ulotlar, talabalar va aspirantlarning ilmiy ishlari umumiy soni oltita bo‘lgan universitet “maktab”larida olib boriladi
Har bir maktabning boshqaruv administratsiyasi, bir nechtadan fakulteti, ilmiy-tekshirish institutlari, laboratoriyalari bor.
Kembrij universitetiga aloqador, bitiruvchilar, tinglovchilar va o‘qituvchilar Nobel mukofoti olish bo‘yicha dunyoda birinchi o‘rinda turadi. Ushbu universitetning 88 bitiruvchi va tinglovchilari va o‘qituvchilari ushbu nufuzli mukofotni qo‘lga kiritgan.
Ushbu universitetda 20 mingga yaqin talaba bakalavr va magistrlik diplomi uchun tahsil oladi. Ularning 34 foizi xorijlik talabalardir. Kembrijda 8 ming o‘qituvchi ishlaydi.
1. Oksford universiteti, Buyuk Britaniya
Mana uch yildirki, Oksford universiteti ushbu reytingda birinchi o‘rinni hech kimga bermay kelyapti. Tadqiqotlar bilan shug‘ullanish ko‘lami, tadqiqotlar soni, tadqiqotlarning muvaffaqiyatli chiqishi va yana bir qator ko‘rsatkichlar bo‘yicha ushbu universitet bir necha yildan beri eng yuqori natijalarni ko‘rsatyapti.
Oksford universiteti Buyuk Britaniyadagi eng yirik va eng qadimiy oliygoh sanaladi. Umumiy hisobda ushbu reytingdan Buyuk Britaniyaning 24 ta nufuzli OTMlari o‘rin olgan.
Oksfordda ta’lim olish pullik va u bu yo‘nalishda dunyodagi eng qimmat OTM hisoblanadi.
Shuningdek, Oksford dunyodagi ko‘plab boshqa reytinglarda ham eng yuqori o‘rinlardan birini egallaydi.
Universitetda 20 mingga yaqin talaba bakalavr va magistrlik diplomi uchun tahsil oladi.
Izoh (0)