Польшанинг Татри тоғларида яшин уриши оқибатида тўрт киши ҳалок бўлди ва яна юзга яқин одам жароҳат олди, деб хабар беради Tengrinews.
Сўнгги маълумотларга кўра, ҳалок бўлганлар орасида икки нафар болакай ҳам бор.
«Юзга яқин жабрланувчи. Тез-тез янги маълумот келиб турибди. Кўпчилик оғир психологик аҳволда», — дейди Польша бош вазири Матеуш Моравеский.
Бош вазирнинг таъкидлашича, сўнгги бор бу каби фожиа 83 йил олдин Гевонт тоғида содир бўлган: 1936 йили ҳам тўрт киши ҳалок бўлган эди.
Фожиа содир бўлган жойлардан бири Гевонт тоғи бўлиб, кучли яшин туристлар гуруҳига урилган. Бир неча киши жароҳат олган. Тезкор кўрсатилган ёрдамга қарамай 12 ёшли болакайнинг ҳаётини сақлаб қолишнинг имкони бўлмаган.
Қутқарувчиларнинг сўзларига кўра, яшин тоғ тепасига ўрнатилган металл хочга, шунингдек, тоғдаги металл занжирлар билан ўралган туристлар йўлагига урилиб, хавф туғдириши мумкин.
Қутқарув операциясига тўртта вертолёт жалб этилган.
Изоҳ (0)