Термизда «Мен ғолибман» танловининг ҳарбий округ босқичига старт берилди

Термиз шаҳридаги «Алпомиш» ўйингоҳида «Мен ғолибман» шиори остида ўтаётган «Энг илғор мутахассис» кўрик-танловининг Жануби-ғарбий махсус ҳарбий округ босқичига тантанали равишда старт берилди. Бу ҳақда Мудофаа вазирлиги Ахборот ва оммавий куммуникациялар департаменти «Дарё»га маълум қилди.

Эътиборли жиҳати, Мудофаа вазирлиги миқёсида ҳар йили анъанавий тарзда ўтказилиб келинаётган мусобақага илк бор кенг жамоатчилик жалб этилди.

Тадбирнинг расмий қисмида Сурхондарё вилояти ҳокимининг ўринбосари Рўзимурод Чориев, Жануби-ғарбий махсус ҳарбий округ қўшинлари қўмондонининг ўринбосарлари полковниклар Қодир Турсунов ва Жамшид Каримов ҳамда бошқалар сўзга чиқиб, ушбу танловнинг ҳарбий хизмат нуфузини янада ошириш, ҳарбий хизматчиларнинг касбий маҳоратини мустаҳкамлаш ва етук мутахассисларни саралаб олишда муҳим аҳамиятга эга эканлигини таъкидлади.

Ўйингоҳда ҳарбий хизматчиларнинг бадиий ва кўргазмали чиқишлари, ранг-баранг концерт дастури Ватан ҳимоячилари ва уларнинг оила аъзолари, ўқувчи-ёшларга байрамона кайфият бағишлади.

Шундан сўнг танлов иштирокчилари баҳсга киришди. 100 ва 3000 метрга югуриш, ўқ отар қуролни нотўлиқ қисмларга ажратиш ва йиғиш, автомобиль техникаларининг двигателларини хизмат кўрсатишга тайёрлаш, уларга аккумулятор улаш каби шартларни бажарди.

Ҳар бир шартни кўп сонли томошабинлар олдида амалга оширилиши танловга янада шиддат, унинг иштирокчиларига эса қўшимча масъулият бағишлади. Жами 10 дан ортиқ йўналиш, 7 шартдан иборат кўрик-танловнинг навбатдаги баҳслари полигон шароитида давом эттирилади.