Урганчдаги Ашхобод кўчасига кўчирилган аҳолига берилган компенсация пули Республика бюджетидан ссудага олинган бўлиб, ушбу маблағлар қайтарилади. Бу ҳақда Урганч шаҳар молия бўлими бошлиғи Жамшид Сапаев «Дарё» мухбирига берган интервьюсида айтиб ўтди.
Урганчдаги Ашхобод кўчасидан Чондирқиёт қишлоғи ҳудудига кўчириб юборилган ва далада палатка ва чартак (капа) қуриб яшаётган, аммо 1—2 ойдан бери компенсация пулини ололмаётган аҳоли ва ҳокимлик ўртасида можаро юзага келгани, норози аҳоли 26 июль куни «Урганч—Хонқа» йўлини ёпиб қўйган.
Шундан сўнг вазиятга Хоразм вилояти ҳокими Фарҳод Эрманов аралашиб, 10 августгача компенсация бўйича тўлиқ ҳисоб-китоб қилинишини билдирган эди. Кейинроқ Президент Шавкат Мирзиёев Хоразмда юзага келган вазиятни ҳал қилиш учун бош вазир Абдулла Ариповни ҳудудга юборган. Ўша куни Миллий банкнинг Урганч бўлими ходимлари томонидан компенсация пуллари тарқатила бошлаган. Режага кўра, 27 июлнинг ўзида 207 та хонадон эгасига келишув шартномасида кўрсатилган компенсация пулининг 50 фоизи миқдорида — жами 21 миллиард сўм тақсимлаб берилиб, 10 августгача эса, барча хонадон эгалари билан 100 фоиз ҳисоб-китоб қилиниши режалаштирилган. Жами 394 та хонадон эгаси 70 миллиард сўмдан ортиқ компенсация пулини олиши кўзда тутилган.
«Дарё» мухбирининг «қандай молиявий режага асосланиб хонадонлар бошқа жойга кўчирилганди», деган саволга Урганч шаҳар молия бўлими бошлиғи Жамшид Сапаев «снос»ларга «Э-ИЖРО АУКЦИОН»дан тушган маблағлар эвазига қопланиши кўзда тутилганини айтиб ўтди.
«Вилоят бўйича маблағлар кам тушди. Июль ойи охирларида 1 миллиард 400 миллион сўм тушган бўлса, унинг ҳаммаси Ашхобод маҳалласидан кўчириб келинганларга ажратиб берилди. Умумий тушумни иккинчи чоракда режадан орттириб бажариш кам бўлганлиги сабабли уй эгаларини маблағ билан таъминлашда узилиш бўлди», — деди Сапаев.
Унинг қўшимча қилишича, бюджетдан «снос»га маблағ режалаштирилмагани сабабли республика бюджетидан қўшимча ёрдам сўралган.
«Республика бюджетидан 51 миллиард сўм ссуда ажратишни сўраб мурожаат қилган эдик. Лекин Республикада бюджетидан аввал биринчи даражали, яъни иш ҳақи ва бошқа тўловларни ёпиб бўлинганидан сўнг 40 миллиард сўм ажратилди. Албатта, ссуда — қарз, уни вилоятга тушган маблағлардан қайтарамиз», — деди у.
Хонадон эгаларидан нима учун эски уйининг баҳосидан 10 фоиз миқдорида маблағ ушлаб қолиш белгилангани ва у кейинчалик нега бекор қилинди, деган саволга Сапаев Вазирлар Маҳкамасининг 97-қорорига кўра бузилган уйдан чиққан материаллар баҳоланиб, уйнинг баҳосидан чегириб қолиниши кераклигини маълум қилди.
«Аслини олганда чегириб қолиш 20 фоиздан ҳам ошиб кетарди. Вазият бунақа бўлгани ва аҳолига оғирлик тушмасин деб тахминан 10 фоиз қилиб белгиланган эди. Баъзиларидан 2—3 фоиз, умуман қайтарилмаганлари ҳам бор. Лекин бу халқни норозилигига олиб келгани йўқ. Ушлаб қолиниши керак бўлган пуллар уларнинг шароитини янада яхшилаш, тезроқ уйини битириб олишига кўмаклашиш мақсадида Президентимизнинг совғаси сифатида қайтарилди», — дея таъкидлади Сапаев.
Аввалроқ, Урганч шаҳар ҳокими Шуҳрат Абдуллаев норозилик туфайли Урганч—Ҳазорасп автомобиль йўлини тўсиб қўйган аҳоли вакилларига чора кўрилмаслигини билдирганди.
Изоҳ (0)