6 август куни ЎзАда «ФОТОФАКТ: Деҳқонободдаги машҳур «Жин кўприк» ҳамон янгиланмаган» сарлавҳали мақола чоп этилди. Мақола муаллифи Шерали Отабоев ўз қарашларини баён этар экан, Деҳқонободдаги ўша машҳур жин кўприклар кўпчиликда қизиқиш уйғотганини, бу борада кўплаб ўрганишлар қилинганини таъкидлайди. Ҳамда Деҳқонободда янги қурилган кўприк аҳолига топширилганлигини ҳақида сўз очиб, «Орадан бир ярим ой ўтиб Деҳқонобод туман мутасаддилари «туманда жами 27 та кўприк қурилади. 13 та кўприк фойдаланишга топширилди. Унда Чоштепа қишлоғидаги 110 ва 170 метрлик иккита хавфли кўприк ҳам қайта қурилади», дея ваъда берган эди, деб дастлабки мақоладан иқтибос келтиради.
Журналистнинг синчковлик билан ҳудудни кўздан кечиргани, жин кўприкларга эътибор қаратгани таҳсинга лойиқ албатта, аммо мухбир шу ўринда ўзининг эътиборсиз журналист эканлигини ҳам ошкор қилиб қўяди. «Дарё» интернет нашрида берилган хабарда янги қурилган кўприк Деҳқонобод туманининг «Мустақиллик» маҳалласи аҳолиси учун қурилганлиги, «Мустақиллик» маҳалласи ва туман марказини боғловчи ушбу кўприкнинг узунлиги 40 метр эканлиги ёзилади. Ва хабар сўнгида жин кўприклар ҳақида сўз очилиб, уларнинг қачон таъмирланиши номаълумлиги ёзилади.
ЎзА мухбири эса ўқувчига юзланиб, ўша хабарда жин кўприкнинг янги қурилгани ҳақида хабар беришганди дея уқтиришга уринади. Жумладан у шундай дейди: «...янги кўприк қурилгани ҳақидаги хабарлар ижтимоий тармоқларни қамраб олди. Ҳаттоки, шарлар билан безатилган янги кўприк суратлари оммага намойиш этилди. Унда оддий халқнинг қувончи ҳам акс эттирилди. Гўёки, «Жин кўприк»лардан қутулдик қабилидаги гаплар ҳам тарқатилди...» дейди.
Журналистнинг Деҳқонободда янги кўприк қурилгани ҳақидаги хабарни синчиклаб ўқимагани мақола сарлавҳасидаёқ сезилади. «ФОТОФАКТ: Деҳқонободдаги машҳур «Жин кўприк» ҳамон янгиланмаган». Сарлавҳани ўқибоқ, савол туғилади. Илгари қайсидир ОАВда, хусусан «Дарё»да жин кўприк янгиланди деган хабар берилганмикин ўзи? Берилмаган, бўлса журналист бу фактни кимга кўрсатяпти? «Дарё» логотипи кўрсатилган расм нега қўйилди унда?
Журналист Шерали Отабоев мақоласида: «Аммо яқиндагина бориб кўрганимиз, «Қил кўприк» ўзининг қиёфасини ўзгартирмаган ҳолда турибди. Аҳоли ҳали-ҳануз ўзининг «севимли» кўпригидан ўтиб қайтиб турган экан. Назаримизда бу «қил кўприк»лар ҳали халққа узоқ йиллар мобайнида хизмат қилади», — деб фикрида давом этади.
Ҳолбуки, «Дарё»да Деҳқонободдаги янги кўприк қурилгани тўғрисидаги хабар якунида шундай дейилади: «Эслатиб ўтамиз «Дарё»да чоп этилган мақолада туманнинг Чоштепа қишлоғидаги узунлиги 170 ва 110 метрлик кўприклар хусусида сўз борганди. Мазкур қишлоқдаги кўприклар замонавий типдаги кўприкларга айланадими ёки йўқми буниси ҳозирча номаълум. Бироқ, ҳокимлик мутасаддиларининг айтишича туманда яна 14 та кўприк қурилиши режалаштирилган бўлиб, кўприк қуриш ишлари 2019 йил якунланади».
ЎзА журналисти мақола сўнгида «Мана мактаб ўқувчиларининг ёзги таътили ҳам тугаб бормоқда, аммо ваъда берилган кўприкдан дарак йўқ. Ҳадемай куз ҳам ўтиб қиш кириб келса, хатарли кўприкдан ёш болаларнинг ўтиши ундан-да хатарли бўлиши аниқ», — дейди.
Бинобарин, жин кўприк ҳақидаги хабарларнинг бирида туман ҳокимлиги мазкур қишлоқдан 63-умумтаълим мактабига қатновчи 104 нафар ўқувчининг жин кўприкдан ўтиб юришига чек қўйиш мақсадида асосий кўприкдан ўтган жойда қад ростлаган Саноат касб-ҳунар коллежидан 4 та синфхона ажратиб, икки «смена»да ўқишни йўлга қўйганлиги ҳақида хабар бергандик. Бу маълумот ҳам фотофакт илинувчи ҳамкасбимизнинг эътиборидан четда қолган кўринади. Йўқса бу кўприкдан мактаб ўқувчилари ўтмай қўйганлигини аллақачон фаҳмлаган бўларди.
Шерали Отабоев бутун бошли мақоланинг фақатгина бир жойида ҳақ гапни ёзади. МФЙ раиси Шерзод Боллиев сўзларини келтириб, орадан ойлар ўтса-да, кўприк таъмирланиши орқага сурилаётганини танқид қилади. Тан олиш керак, журналист бу борада ҳақ.
ЎзА журналистининг кўпчиликни қизиқтирган ва оммани ўзига тез жалб қилувчи, илгари кўтарилган масалани кўтариб чиқиб ўқувчи эътиборини қозонишга уринишини тўғри тушунамиз, албатта. Аммо бу дегани ўқувчига нотўғри маълумот етказиб, уни чалғитиш керак деганимас-ку.
Изоҳ (0)