Бугун, 30 июль куни Ўзбекистон Республикаси Президенти «Одам савдосига ва мажбурий меҳнатга қарши курашиш тизимини янада такомиллаштиришга оид қўшимча чора-тадбирлари тўғрисида»ги Фармонни имзолади. Мазкур ҳужжат 30 июль — Одам савдосига қарши курашиш кунида қабул қилингани бежиз эмас, албатта.
Сабаби, мамлакатимизда одам савдоси қурбонларини аниқлаш, ҳимоялаш, ижтимоий реабилитация қилиш, уларга тиббий, психологик ҳамда бошқа ёрдам кўрсатиш бўйича самарали фаолиятлар йўлга қўйилмоқда.
Энг муҳими, болалар меҳнатига барҳам берилди, қишлоқ хўжалиги ишлари, ҳудудларни ободонлаштириш ва кўкаламзорлаштириш даврида катталарнинг мажбурий меҳнатидан фойдаланишга чек қўйиш бўйича мисли кўрилмаган чора-тадбирлар амалга оширилмоқда.
Шунга қарамай, ҳозирги вақтда одам савдосига самарали қарши курашишга ва мажбурий меҳнатдан фойдаланишга тўсқинлик қилаётган бир қатор салбий омиллар ҳам сақланиб қолинмоқда.
Давлатимиз раҳбарининг мазкур Фармони, энг аввало, одам савдоси ва мажбурий меҳнатга қарши курашишда, мамлакатимизнинг халқаро майдондаги ижобий имижини яратишда давлат органлари фаолиятини мувофиқлаштиришнинг таъсирчан тизимини яратишда дастуриламал бўлади, десак муболаға бўлмайди.
Фармонга биноан Одам савдосига қарши курашиш бўйича Республика идоралараро комиссияси Одам савдосига ва мажбурий меҳнатга қарши курашиш миллий комиссияси этиб қайта ташкил этилди. Қолаверса, унинг Ўзбекистон Республикаси Олий Мажлиси Сенати Раиси бошчилигидаги янгиланган таркиби ҳам тасдиқланди.
Давлат органлари ва ҳудудий органларнинг, фуқароларнинг ўзини-ўзи бошқариш органлари ва нодавлат нотижорат ташкилотларининг одам савдосига ҳамда мажбурий меҳнатга қарши курашиш соҳасида улар фаолияти самарадорлигини, мустаҳкам ҳамкорлик қилишлари ва баҳамжиҳат ишлашларини таъминлаш мақсадида уларнинг фаолиятини мувофиқлаштириш Миллий комиссиянинг асосий вазифаларидан саналади. Бундан ташқари, миллий қонунчилик ва ҳуқуқни қўллаш амалиётини такомиллаштириш, уларнинг ижросини назорат қилиш мақсадида одам савдосига ҳамда мажбурий меҳнатга қарши курашиш соҳасида давлат дастурлари ҳамда бошқа дастурларни ишлаб чиқиш ва амалга оширишни ташкиллаштириш, қолаверса, одам савдосига ва мажбурий меҳнатга қарши курашиш бўйича кўрилаётган чора-тадбирларни таҳлил қилиш, баҳолаш, мониторинг қилиш ва самарадорлигини ошириш, ушбу соҳадаги жиноятларни аниқлаш, тафтиш қилиш, олдини олиш ва уларга чек қўйиш амалиётини ўрганиш назарда тутилмоқда.
Шунингдек, одам савдосига ҳамда мажбурий меҳнатга қарши курашиш соҳасида самарали халқаро ҳамкорлик ва баҳамжиҳат ҳаракатни ташкил этиш, мазкур соҳада ахборотларни йиғиш, таҳлил қилиш ва маърузалар тайёрлаш ҳам асосий вазифалар ҳисобланади.
Фармон билан Қорақалпоғистон Республикаси Жўқорғи Кенгеси раиси, вилоятлар, Тошкент шаҳар, туманлар (шаҳарлар) ҳокимлари зиммасига одам савдосига ва мажбурий меҳнатга қарши курашиш бўйича ҳудудий комиссияларга раҳбарлик қилиш вазифаси юкланмоқда.
Бундан ташқари, Ўзбекистон Республикаси Президенти Фармони билан Одам савдосига ва мажбурий меҳнатга қарши курашиш бўйича миллий маърузачи институти таъсис этилди, унинг функциялари Миллий комиссия раиси зиммасига юкланди. У одам савдосига ва мажбурий меҳнатга қарши курашиш соҳасида мамлакатимиз ва жаҳонда юзага келаётган вазият тўғрисида, ушбу жиноят турига дахлдор шахсларни тақдим қилиш ва жазолаш ҳамда одам савдоси қурбонларини қўллаб-қувватлаш бўйича кўрилаётган чора-тадбирлар ҳақида Ўзбекистон Республикаси Президентига ҳар йили маълумот тақдим этиб туради.
Шу билан бирга, мазкур соҳада республикамизда кўрилаётган чора-тадбирлар ҳақидаги ишончли ахборотни кенг жамоатчиликка ва халқаро ҳамжамиятга етказиш мақсадида Ўзбекистон Республикаси аккредитация қилинган хорижий давлатларнинг дипломатик корпуси ва халқаро ташкилотларнинг ваколатхоналарини жалб этган ҳолда оммавий ахборот воситалари учун мунтазам брифинглар ташкил этилади.
Миллий маърузачи одам савдосига ва мажбурий меҳнатга қарши курашиш соҳасида халқаро ҳамжамият билан, ушбу соҳада ихтисослашаётган ташкилотлар ва ҳуқуқ ҳимоячилари билан самарали ҳамкорлик ва ҳамжиҳатликни таъминлайди. Шунингдек, мазкур соҳада республиканинг халқаро майдондаги миллий манфаатларини ҳимоя қилиш Миллий маърузачининг яна бир муҳим вазифасидир.
Мухтасар қилиб қилиб айтганда, ушбу Фармон билан одам савдосига ва мажбурий меҳнатга қарши курашиш борасида яна бир муҳим қадам қўйилди. Бу эса мазкур соҳадаги қонунчилик такомиллашиб, пировард мақсадида инсон ҳуқуқлари ва эркинликларини таъминлашга хизмат қилади.
Сайёра БАРАТОВА,
Олий Мажлис Сенати аъзоси.
Изоҳ (0)