Аввал хабар берганимиздек, 29 июль куни республиканинг барча ҳудудларида олий таълим муассасаларининг бакалавриат йўналишига ўқишга кириш учун тест синовлари бошланган эди. 16 кун давом этадиган тест синовлари ўтказилиши учун 66 та бино тайёрланган, уларнинг энг каттаси бир вақтнинг ўзида 1710 абитуриентни қабул қилади. «Дарё» мухбири бугун «Ўзекспомарказ» биноларида ўтказилаётган синовлар жараёнидан фотолавҳалар тайёрлади.
Тест синовлари ҳар куни 2 сменада: эрталаб соат 08:00 ҳамда тушдан кейин 15:00 дан бошлаб ўтказилмоқда. Шунга мувофиқ, ОАВ вакиллари ҳам 2 маҳал, эрталаб 10:00 дан 10:20 гача, тушдан сўнг соат 17:00 дан 17:20 гача имтиҳон жараёнлари ўтказилаётган аудиториялардан материаллар тайёрлашига рухсат этилган.
Ахборот технологиялари ва коммуникацияларини ривожлантириш вазирлиги ИИВ билан ҳамкорликда бинолар учун 1155 дан ортиқ видеокузатув камераси, 120 дона мобил алоқаларини тўсувчи қурилма, абитуриентлар сонидан келиб чиққан ҳолда металлорамалар, бармоқ изи асосида таниш воситалари ўрнатди.
Тест синовлари ўтказиладиган биноларга захира электр тармоқлари уланган. Биноларнинг манзиллари ва жойлашувини Давлат тест маркази сайтида тўлиқ кўриш мумкин.
Изоҳ (0)