Samarqand shahridagi 105-sonli maktabgacha ta’lim muassasasi tarbiyalanuvchisi bilan bog‘liq hodisa yuzasidan viloyat maktabgacha ta’lim boshqarmasi o‘z munosabatini bildirdi.
24-iyul kuni Samarqand shahridagi 105-sonli maktabgacha ta’lim muassasida tarbiyachining e’tiborsizligi sabab 2014-yilda tug‘ilgan Alisher Hamidov kaltaklanib, sochi qirqilgan holati yuzasidan Samarqand viloyat Maktabgacha ta’lim boshqarmasi ishchi guruhi tomonidan o‘rganish olib borildi. Samarqand shahar maktabgacha ta’lim bo‘limi tasarrufidagi 105-sonli maktabgacha ta’lim tashkilotida ayni paytda 11 ta to‘liq muddatli guruhlarda 428 nafar bola tarbiyalanmoqda. Samarqand shahar maktabgacha ta’lim bo‘limi boshlig‘ining 2019-yil 27-iyundagi 127-sonli buyrug‘i bilan muassasa mudirasi Dilfuza Rahimova 27-iyundan 6-avgustga qadar navbatdagi mehnat ta’tiliga chiqarilgan. Shu sababli MTT mudirasi vazifasini D.Kozimova vaqtincha bajarib kelgan.
Ishchi guruhning o‘rganishi davomida 105-sonli maktabgacha ta’lim tashkilotida tarbiyalanuvchisi Alisher Hamidovning sochini guruh tarbiyalanuvchi J.M. qaychi bilan qirqqanligi aniqlandi. Tarbiyalanuvchi Alisher Hamidovni onasi uyiga olib ketayotgan paytida uni ko‘ziga guruh tarbiyalanuvchisi A.R. o‘yin mobaynida urib yuborilganligi natijasida ko‘zi qizarib qolgan. Shuningdek, guruh tarbiyalanuvchilaridan birining turtib yuborishi natijasida Alisherning bir dona tepa qismdagi tishi qimirlab qolgan.
O‘rganish davomida MTT tarbiyachisi Umida Tagiyeva O‘zbekiston Respublikasi Maktabgacha ta’lim vazirining “Maktabgacha ta’lim vazirligi va uning tizimidagi xodimlari asosiy lavozimlarining malaka tavsiflari”da davlat maktabgacha ta’lim muassasasi tarbiyachisining lavozim vazifalarini buzganligi aniqlandi. Xususan, Umida Tagiyeva o‘z xizmat vazifalariga sovuqqonlik va mas’uliyatsizlik bilan qarab, malaka talablarida belgilangan xizmat vazifalarini to‘liq bajarmagan. Bolalarni nazoratsiz qoldirganligi oqibatida Alisher Hamidovning jarohat olish holati yuzaga kelgan. Shu sababli 105-son MTT mudirasi vazifasini vaqtincha bajaruvchi D.Kozimovaning 26-iyuldagi 7-K-sonli buyrug‘iga asosan tarbiyachi Umida Tagiyeva bilan tuzilgan mehnat shartnomasi bekor qilindi.
Maktabgacha ta’lim muassasasi mudirasi vazifasini vaqtincha bajaruvchi D.Kozimova o‘z xizmat vazifalarini lozim darajada bajarmasdan, nazoratni susaytirib yuborganligi sababli unga nisbatan Mehnat kodeksining 181-moddasi 1-qismi, 1-bandiga asosan “Hayfsan” intizomiy jazosi qo‘llanildi.
Ishchi guruhining ma’lumotida qayd etilishicha, muassasaning 8-guruh ota-onalar qo‘mitasi raisi Yulduz Akbarova ota-onalar bilan o‘zaro kelishgan holda o‘zlarining tashabbuslari bilan bolalarga sharoitni yaxshilash maqsadida 100 ming so‘mdan pul yig‘ish taklifini kiritgan. Bu orqali guruhga kerakli jihozlarni sotib olib, Yulduz Akbarovaning turmush o‘rtog‘i tomonidan o‘rnatib olishga kelishib olganliklari aniqlandi. Ayrim ota-onalar ishlashi sabab, 8 nafar ota-ona pullarini tarbiyachi Umida Tagiyevaga berib ketganliklari aniqlanib, o‘rganish davomida Umida Tagiyeva ushbu pullarni ota-onalar qo‘mitasi raisi Yulduz Akbarovaga qaytarib bergan. Yulduz Akbarova va boshqa 8 nafar ota-ona ushbu pullarni o‘z zohishlariga ko‘ra, o‘zlarining tashabbuslari bilan berganliklarini bildirib tushuntirish xati yozib bergan.
Ushbu holatda ham Umida Tagiyeva ota-onalarning tashabbusi bilan pul yig‘imi amalga oshirilgan bo‘lsa-da, 8 nafar ota-onadan o‘z xizmat vazifalaridan chetga chiqib, pul yig‘imiga aralashgan. Shuningdek Umida Tagiyeva 5000 so‘m pulni har oyda ota-onalardan yig‘ib olib, ushbu pullarga yuvuvchi vositalar, hojatxona qog‘ozi, supurgi sotib olish uchun ishlatishini bildirdi.
O‘rganish natijasi bo‘yicha mutaxassislar tomonidan 105-sonli MTT mudirasi va xodimlariga yuzaga kelgan noxush holatni kelgusida takrorlanishini oldini olish bo‘yicha tegishli chora-tadbirlar belgilab olindi.
Izoh (0)