Давлат пенсия таъминотини ислоҳ қилиш концепциясида пенсия ёши асосий масала сифатида кўрилаётгани йўқ. Бу ҳақда Бюджетдан ташқари Пенсия жамғармаси ижро этувчи директори ўринбосари журналистлар билан бўлиб ўтган очиқ мулоқотда айтиб ўтди, дея ҳабар бермоқда «Дарё» мухбири Мусулмонбек Иброҳимов.
Шуҳратжон Давроновнинг маълум қилишича, бугунги кунда давлат пенсия таъминотини ислоҳ қилиш концепцияси кўриб чиқилмоқда. Концепция доирасида пенсия ёшини ошириш, пасайтириш ёки бошқа ўзгартиришлар киритиш асосий масала сифатида кўрилаётгани йўқ.
«Концепцияда бир қанча йўналишлар кўриб чиқилиб, Халқаро меҳнат ташкилотининг принципларига монанд равишда экспертлар билан ишлар олиб борилмоқда. Йил якунига қадар ушбу концепция лойиҳасини оммага тақдим этиш кўздан тутилган», — дея таъкидлади ўринбосар.
Жамғарма вакилининг қўшимча қилишича, ҳозирги пенсия ёши Собиқ иттифоқ давридан буён амалда.
«Дунёда энг паст пенсия ёши Ўзбекистонда қолиб кетганлигини кўришимиз мумкин. Пенсия ёши 1956 йилда Собиқ иттифоқ мамлакатлари пенсия қонунчилигидан қолиб кетган. Ўша давр статистикасига қарайдиган бўлсак, ўртача умр кўриш 47 йил бўлган. Ваҳоланки, бугунги кунда ўртача умр ёши ўсган», — деди у.
Аввалроқ Ўзбекистонда пенсия ёшининг оширилиши 2021 йилдан сўнг амалга ошиши айтилган эди. Унда пенсия ёшининг оширилиши 2022 йилга кўчирилиши ҳам мумкинлиги қўшимча қилинган.
Давлат пенсия таъминотини ислоҳ қилиш концепциясига мувофиқ, Ўзбекистонда эркаклар учун пенсия ёшини 63, аёллар учун 58 ёшгача босқичма-босқич ошириш кўзда тутилмоқда. Пенсия ёши ҳар йили 6 ойга ошириб борилади.
Изоҳ (0)