Digital Generation Uzbekistan loyihasining 25 ta ishtirokchisi Belarus davlatiga “IT tur”ga yo‘llanma oldi

Digital Generation Uzbekistan boshlanganiga 1,5 oy bo‘lib, uning doirasida o‘tgan davr mobaynida dastlabki tadbir — Digital Generation Camp tashkil etildi. Mazkur tadbirga respublikaning barcha hududlaridan 700 dan ortiq nomzodlardan ariza kelib tushgan. Ular orasidan 80 nafari esselarni baholash va intervyu davomida saralab olindi.

Ta’kidlash kerakki, ushbu oromgohdagi mashg‘ulotlarda qatnashish mutlaqo bepul bo‘lib, dars mashg‘ulotlarini sohaning mutaxassislari bo‘lgan — ko‘ngilli mentor va volontyorlar olib boradi.

Ularga 18—22-iyun kunlari Bo‘stonliq tumanidagi Digital Generation Camp yozgi oromgohida yosh, tashabbuskor, shijoatli va malakali mentorlar, mahalliy va xalqaro ekspertlar tomonidan master-klass, trening, amaliy mashg‘ulotlar hamda kichik loyiha bajarish topshiriqlari bo‘yicha dars o‘tkazildi.

Natijada, qatnashgan barcha ishtirokchilar o‘zlari qiziqish bildirgan sohalar bo‘yicha (dasturlash, dizayn, media, robototexnika) zarur bilim va ko‘nikmalarga ega bo‘lib, zamonaviy dolzarb kasb sohibi bo‘lishida dastlabki qadamni tashladilar hamda zimmasiga bitta mas’uliyatni oldi.

Loyiha doirasidagi birinchi oromgohdagi o‘quvlarda qatnashgan har bir ishtirokchi o‘z hududida kamida 5 nafar yoshga o‘rgangan bilimini o‘rgatish va trening o‘tishni bo‘yniga oldi. U ham loyiha tamoyiliga asosan bepul amalga oshiriladi.

Dastlabki tadbir yakunida tashkilotchilar tomonidan ishtirokchilar, mentor va volontyorlar faoliyati munosib rag‘batlantirilishi haqida aytilgan edi.

Shunga ko‘ra, Digital Generation Uzbekistan loyihasi tashkilotchilari tomonidan 25 nafar yoshlardan iborat guruh joriy yilning 5—8-avgust kunlari qisqa muddatli malaka oshirish va tajriba almashish maqsadida Belarus respublikasiga yuboriladigan bo‘ldi.

Safar davomida ular o‘z loyiha va takliflarini Belarusdagi “Yuqori texnologiyalar parki”da IT-sohasida biznes yuritish va mehnat bozori kabi muhim yo‘nalishlar bo‘yicha zarur ko‘nikmalarga ega bo‘ladi.

Bundan tashqari, safar davomida biznes aloqalar ham yo‘lga qo‘yilib, hamkorlikda loyihalarni ishlab chiqish, muayyan buyurtmalarni mahalliy bozorga olib kelib, loyiha doirasida tayyorlangan qobiliyatli yoshlar uchun imkoniyat eshigini ochishga erishiladi.