Наманганда йиллик қуввати 1,5 млн тонна бўлган цемент заводи қурилиши бошланди (фото)

Наманган вилоятининг Янгиқўрғон туманида йиллик қуввати 1,5 миллион тонна бўлган цемент заводи қурилиши бошланди. Бу ҳақда «Дарё» мухбири Азизбек Абдувалиев хабар бермоқда.

Завод Намангандаги «Бунёдкор Маҳсудбек Файз» фермер хўжалиги ҳамда Хитойнинг Hebei Yijia Cheng Trading компанияси ҳамкорлигида ташкил этилган «Namangan Jinmingyang building materials» Ўзбекистон—Хитой қўшма корхонаси томонидан барпо этилмоқда.

Туманнинг Поромон қишлоғида 40 гектар майдонда қад ростлайдиган заводнинг лойиҳа қиймати 105 миллион доллар бўлиб, бундан 90 миллион доллари хориж инвестицияси ҳисобланади.

— Бу жуда катта лойиҳа, унинг қуввати ҳозирда вилоятда барпо этилаётган цемент ишлаб чиқариш корхоналарини жамлаганда ҳам кўп, — дейди вилоят иқтисодиёт ва саноат бош бошқармаси бошлиғи Фазлиддин Иномов. — Ҳозирда Косонсой туманида лойиҳа қуввати йилига 250 минг тонна, Поп туманида 500 минг тонна, Чуст туманида 250 минг тонна ҳамда Янгиқўрғон туманида 200 минг тонна бўлган цемент заводлари қурилмоқда. Энди уларнинг сафига бешинчи корхона қўшилди.

Қурилиш ишлари 2020 йил тўртинчи чорагида якунланиши кўзда тутилган. Завод тўла қувват билан фаолиятини бошлагач 700 киши иш билан таъминлади. М-400 ҳамда М-500 маркали, юқори сифатли цемент маҳсулотлари ишлаб чиқарилади.