Тошкентда 2019 йилнинг учинчи чорагида патруль автоуловларида кўча ва чорраҳаларда транспорт воситалари ҳайдовчиларининг тўхташ ва тўхтаб туриш қоидаларини бузиш қоидабузарликларини автоматик тарзда аниқлаш тизими жорий этилади. Бу ҳақда 16 июль куни Тошкент шаҳар ИИББда ўтказилган брифингда Тошкент шаҳар ИИББ ЙҲХ бошқармаси бошлиғи ўринбосари подполковник Азиз Садиров маълум қилди, дея хабар бермоқда «Дарё» мухбири Мусулмонбек Иброҳимов.
«Ҳозирги кунда патруль автоуловларида хизматда фойдаланиб келинаётган «AutoCon» русумли мобил қурилмага қўшимча дастурий таъминот «Абл-Софт» компанияси томонидан ишлаб чиқилади. У асосида пойтахт кўча ва чорраҳаларида транспорт воситалари ҳайдовчиларининг тўхташ ва тўхтаб туриш қоидаларини бузиш қоидабузарликларини автоматик тарзда аниқлаш тизимини тажриба тариқасида 2019 йилнинг учинчи чорагида ишга тушириш режалаштирилди», — деди подполковник Азиз Садиров.
Бошқарма бошлиғи ўринбосари Тошкент ҳалқа автомобиль йўлидаги тўртта бозор яқинида ўрнатилган камералар томонидан (3.27) белгисини менсимаслик ҳолати бўйича аниқланган қоидабузарликлар ҳақида ҳам маълумот берди.
«Транспорт воситаларини тўхташ ва тўхтаб туриш қоидабузарликларини қайд этиш функциясига эга 4 дона айланма кузатув видеокамералари «Тошкент савдо маркази», «Чилонзор буюм бозори» ва «Карвон» бозорларига ўрнатилди. Кузатув видеокамералари 1—9 июль кунлари тест тариқасида синовдан ўтказилган синовда 8240 та қоидабузарлик аниқланди. 10 июль кунидан бошлаб аниқланган қоидабузарликлар бўйича чиқарилган электрон қарорларни манзилларига етказиш учун «КААТ» тизими орқали Ўзбекистон Почтасига электрон тартибда юборилиши йўлга қўйилди. 10—16 июль кунлари 864 та қоидабузарлик аниқланиб, 525 миллион 312 минг сўм жарима белгиланди», — деди Садиров.
Аввалроқ, Тошкент ҳалқа автомобиль йўлидаги «Тошкент савдо маркази», «Бек Тўпи», «Чилонзор буюм бозори» ва «Ўрикзор» бозорлари яқинида ўрнатилган камералар биринчи иш куни ҳайдовчилар томонидан 782 та «Тўхташ тақиқланган» (3.27) белгисини менсимаслик ҳолатини қайд этилгани ҳақида хабар берган эдик.
3.27 белгиси остида автомобилни тўхтатиш Ўзбекистон Республикаси Маъмурий жавобгарлик тўғрисидаги кодекснинг 128-6-моддасига мувофиқ ЭКИҲнинг 3 бараваригача (608 190 сўм) жарима солинишига сабаб бўлиши мумкин.
Изоҳ (0)