UzAuto Motors компанияси томонидан Ўзбекистондаги етакчи ОАВ ходимлари учун автомобиль эҳтиёт қисмлари ишлаб чиқарувчи корхоналар ҳамда Асака автомобиль заводига пресс-тур ташкил этилди. Пресс-тур давомида журналистлар автомобиль ишлаб чиқариш жараёнининг барча босқичлари билан яқиндан танишди.
ОАВ ходимлари дастлаб автомобиллар учун қуйма-кавшарли деталлар ишлаб чиқаришга ихтисослашган UzSungwoo МЧЖ корхонасига ташриф буюрди.
Корхонада Cobalt, Gentra, Nexia 3 ва Damas автомобиллари учун бутловчи деталлар ишлаб чиқарилади. Шунингдек, Россияга экспорт қилинадиган Gazel Next русумидаги учун деталлар ишлаб чиқариш ҳам ўзлаштирилди.Жорий йил охирига бориб «ПСМА Рус» МЧЖ (Россия Федерацияси) базасида ишлаб чиқариладиган Peugeot Expert, Citroën Jumpy, Citroën Berlingo ва Peugeot Partner автомобиллари учун 52 номдаги қуйма деталлар ишлаб чиқаришни ўзлаштириш режалаштирилган.
Кейинги манзил хавфсиз автомобиль ойналари ишлаб чиқаришга ихтисослашган «Автоойна» МЧЖ корхонаси бўлди.
Корхона GM Uzbekistan, «JV MAN Auto-Uzbekistan» МЧЖ ҚК, «SamAvto» МЧЖ, Artel«Эко электрон», «ТТЗ» МЧЖ учун конвейер бутловчи деталларини бирламчи бозорга ишлаб чиқаради.
Таъкидлаш жоизки, ҳозирда автомобиль эҳтиёт қисмлари савдоси билан шуғулланадиган дўконларда «Автоойна» бренди ёпиштирилган қалбаки маҳсулотлар ҳам учрайди. Улар сифатсиз ва белгиланган талабларга жавоб бермайди, бу эса бренд обрўсини туширмоқда. «Харидор ҳақиқий маҳсулот ва қалбакисини қандай ажратиши мумкин?» деган саволга корхона вакили қуйидагича жавоб берди:
«Cobalt олд ойнасига талаб бўйича қорайтирилган чизиқ тушириш мумкин эмас, қалбаки маҳсулотларда ана шундай чизиқ бор. Бундан ташқари, биз ойнага орқани кўришга мўлжалланган ойнакни ёпиштириш учун тошни ҳам ўрнатиб чиқарамиз. Қалбаки маҳсулотларда эса бу тош йўқ. Харидор ойнага ўзи ёпиштиришга мажбур бўлади, у вақт ўтиб тушиб кетади. Албатта, нархида ҳам фарқ бор, қалбаки маҳсулот табиийки арзонроқ».
Автомобиль эгаларига эътиборли бўлишни ва эҳтиёж бўлганида фақат «Автоойна» корхонаси томонидан ишлаб чиқарилган маҳсулотни харид қилишни тавсия қиламиз!
Шундан сўнг журналистлар «UzChasys» МЧЖ корхонасига йўл олди.
«UzChasys» МЧЖ Chevrolet Nexia, Matiz, Spark, Cobalt ва Lacetti моделлари учун полимер материалларидан автомобиль фаралари ва фонарлар ишлаб чиқаришга ихтисослашган. Шунингдек, корхона Lada автомобиллари учун фаралар ишлаб чиқаради ва «АвтоВАЗ» ИЧАЖ (Россия Федерацияси)га экспорт қилади.
Корея (LS, Hankook), Германия (OC Erlicon) ва Япония (Meiki, Yaskawa)нинг етакчи ишлаб чиқарувчиларида тайёрланган замонавий ва юксак технологик жиҳозлар билан таъминланган корхона ноёб ва Марказий Осиёда ўхшаши йўқ ҳисобланади.
Корхонадаги ишлаб чиқариш-технологик жараён 90 фоизга автоматлаштирилган ва робототехника билан жиҳозланган. Унинг фахри МДҲ ҳудудида ноёб бўлган «Меики» юксак технологик термопласт-автомати саналади, у бир вақтнинг ўзида уч рангда қуйма қуйиш имконини беради. Шунингдек, заводнинг узлуксиз ишлашини таъминлаш учун замонавий сув билан совутиш тизими ўрнатилган.
Кундуз пайти автомобиллар фарасини ёқиб юриш амалиёти жорий қилинганидан сўнг кўплаб ёнғинлар кузатилди. Таъкидлаш жоизки, ёнғин сабаблари ўрганилганида ёниб кетган фаралардан биронтаси ҳам «UzChasys» МЧЖ томонидан ишлаб чиқарилмагани аниқланган.
«Ёниб кетган фаралар тадбиркорлар томонидан хориждан келтирилиб сотилаётган, талабга жавоб бермайдиган фаралар эканлиги аниқланди. Улар ҳеч қандай лаборатория текширувидан ўтмаган. Шунинг учун ҳам уларнинг нархи арзон ҳисобланади. Бундай фаралар сифатсиз хом ашёдан тайёрланади, уларни тайёрлашда сифатсиз эҳтиёт қисмлар қўлланилади. Бизда ишлаб чиқарилган фаралар жаҳон стандартларига тўлиқ жавоб беради, улар 32 хил тест жараёнидан ўтказилади. Бунда фараларнинг иссиққа, совуққа, шамол ва вибрацияга таъсири ўрганилади. Фаралар тўхтовсиз ёниб турганида 150-200 даража иссиққа дош бера олади», — корхона раҳбари Фарруҳ Саидаҳмедов.
Кейинги манзил — бутловчи қисмлар ва деталларни ишлаб чиқаришга ихтисослашган «Uz-Dong Won» АЖ қўшма корхонаси бўлди.
Корхонанинг асосий фаолияти Асака автомобиль заводида ишлаб чиқариладиган автомобиллар учун глушителлар, зарбага қарши эшик тўсинлари ва кузов деталларини ишлаб чиқаришдан иборат.
Корхона Daewoo корпорацияси ва «Dong Won Metal» компанияси етказиб берган технологик жиҳозлар билан таъминланган.
«Uz-Dong Won» ҚКда қувурларни кесиш, букиш, учларига шакл бериш бўйича ишлаб чиқариш линиялари ўрнатилган.
Глушителлар, газ ташламалар қувурлари ва зарбага қарши эшик тўсинларини кавшарлама йиғиш линиялари мавжуд, бундан ташқари, корхонада 11 турдаги спорт инвентари ва 22 турдаги халқ истеъмоли товарлари (жумладан, мебел, сут ва сабзавот маҳсулотлари) ишлаб чиқарилади.
Бугунги кунда корхона «Группа ГАЗ» УК (Россия Федерацияси) учун 21 номдаги бутловчи қисмлар етказиб бериш борасида фаол ҳамкорликни олиб бормоқда.Ишлаб чиқариш қуввати: йилига 237 000 та комплект.
Журналистлар ташриф буюрган кейинги манзил «УзКоже» ҚК автомобиллар учун электр жгутлар ишлаб чиқариш корхонаси бўлди.
Корхона автомобиль электр симлари, тўқимачилик машиналари учун жгутлар, вентиляция, иситиш ва совутиш буюмлари учун симлар ишлаб чиқариш бўйича Марказий Осиёда ягона бўлиб, юксак технологик лаборатория ва замонавий синов-техник жиҳозлари билан таъминланган.Маҳсулотнинг кенг диапазони, сифат ва рақобатбардош нархлар корхона ишлаб чиқараётган маҳсулотлар учун автомобиль ва бошқа саноат тармоқларида талабгир бўлиш имконини яратмоқда.
Электр симлар ҳароратнинг кескин ўзгаришига чидамлидир, бу нафақат қизиш, балки -40º C гача совиб кетиш ҳамдир. ҚКда маҳаллий автомобиллар учун электр симлар жгутларини тайёрлашнинг мослашувчан технологиясини ўзлаштириб олдилар.
Бутловчи қисмлар – улар турфа характеристикага эга юзлаб турдаги симлар, шунингдек жами 1000 тача нусхадаги умумий номенклатурадаги бошқа материалларни корхона Жанубий Кореядан олади.
Автомобилларнинг хафсизлигини мустакамлаш учун электр симлар ишлаб чиқаришда ҳарорат, мой ва бензин таъсирига чидамли материаллардан фойдаланилади. Бундан ташқари, ўзидан-ўзи алангаланиш ҳолатида симларнинг ўзи ўчишига хизмат қилувчи махсус кимёвий таркиблар қўлланилади.
Ҳукуматнинг жорий йилдаги 292-сонли қарорига асосан автомобиллар кундуз куни фараларини ёқиб юриш мажбурлиги ва ҳаво исиб кетиши натижасида бир нечта автомобилларнинг фара симлари юкланмага бардош бера олмай, ёниб кетиш сабаблари ҳақида корхона раҳбариятидан изоҳ сўралди. Уларнинг айтишича, симлар ва жгутлар ёнмайдиган полимер материаллардан тайёрланган ва тайёр маҳсулот талабларга қаттиқ риоя қилинган лаборатория текширувидан ўтиб, автомобилларга ўрнатиш учун заводларга юборилади. Ёнғин келиб чиқишига автоуловларнинг симларига кўчадаги усталар томонидан қўлбола ускуна ва симларлар ўрнатилиши сабаб қилиб кўрсатилди.
Хулоса ўрнида
Яқин йилларгача оддий фуқаро автосалондан машина харид қилиш учун кимларгадир «шапка» тўлаши керак эди. Ёки салондан машина олганида бирор нуқсон кўзга ташланар ва автосервисга бориб машинани тузаттириш ҳолатлари ҳам учраб турарди. Бугун айни муаммолар UzAuto раҳбарияти томонидан бартараф этилаётгани кўзга ташланмоқда.
«Шапка» тизими бутунлай бекор қилинди. Харидор автомобилни олдингидай бир неча ойлаб кутмаяпти. Айрим автомобилларни 45 дақиқада харид қилиш мумкин. Тўловни Payme орқали амалга ошириш ҳам мумкин: автомобилга пул тўланади ва у харидорнинг уйига етказиб берилади.
Компания 2019 йилда ISO 37001 Коррупцияга қарши тизим сертификатини олган. Бу эса тизимдаги фирибгарликларнинг бартараф этилиши эътироф этилаётганини билдиради.
Қайд этилишича, келгусида хорижий давлатлар сингари Trade-in дастури ҳам амалга оширилади. Яъни минилган машинани янгисига бемалол алмаштириш имкони яратилади.
Йил охирига қадар янги ранглардаги автомобиллар харидорлар эътиборига ҳавола этилади.
Умуман олганда, компаниянинг ўз фаолиятида харидорлар манфаатини кўзлаб ўзгаришлар қилаётгани таҳсинга сазовор.
Изоҳ (0)