«Буюк Ипак йўли» халқаро фольклор мусиқа фестивалига сўнгги тайёргарлик ишлари бўлиб ўтмоқда (фото)

Фарғона вилояти Марғилон шаҳрида 11—13 июль кунлари «Буюк Ипак йўли» халқаро фольклор мусиқа фестивали бўлиб ўтади.

Марғилон шаҳрида фестивалга тайёргарлик ишларининг сўнгги босқичи бўлиб ўтмоқда. Бу ҳақда Маданият вазирлиги матбуот хизмати «Дарё» мухбири Феруз Муҳаммадга маълум қилди.

Ушбу фестивалга Эрон, Ҳиндистон, Франция, Росссия, Жанубий Корея, Япония, Монголия, Туркия каби 20 та хорижий давлатлардан фольклор жамоаларининг иштирок этади.

Қорақалпоғистон Республикаси, вилоятлар ва Тошкент шаҳридан 14 та фольклор жамоаси иштирок этади.

Фольклор жамоаларининг 200 нафардан ортиқ аъзоси ўз ҳудудларига хос либослар ва қадимий куй-қўшиқлар асосида тайёрланган махсус дастурлари билан қатнашади.

Фестивалда қуйидаги номинациялар бўйича танловлар ўтказилиши белгиланган:

‒ қўшиқчилик санъати (алла, ўлан, лапар, терма, маросим қўшиқлари, халфачилик, бахшичилик ва ҳоказо);

‒ рақс санъати (турли ҳудудларга хос халқ рақслари);

‒ миллий қадим фольклор чолғучилик санъати (миллий мусиқа асбобларида асарлар ижроси).

Иштирокчиларнинг чиқишлари юқори малакали мутахассислар, таниқли санъат ва маданият арбоблари, олимлар, тадқиқотчилар, шунингдек, иштирокчи давлатлардан ташриф буюрган тегишли соҳалар намояндаларидан иборат халқаро ҳайъат аъзолари томонидан баҳоланади.

Фестиваль ғолиблари қуйидаги пул мукофотлари билан тақдирланадилар:1-ўрин (ҳар бир номинация) ‒ 3 500 АҚШ доллари;

2-ўрин (ҳар бир номинация) ‒ 2 500 АҚШ доллари;

3-ўрин (ҳар бир номинация) ‒ 1 500 АҚШ доллари.