Tashkent City’нинг тўртинчи лотида барпо этилаётган осмонўпар бинога сарф этилаётган темирдан 25 мингта нуфузли автомобиль ишлаб чиқариш мумкин. Бу ҳақда 5 июль куни Murad Buildings ва Туркиянинг Ozguven қурувчилик компаниялари раҳбарларининг журналистлар билан бўлиб ўтган очиқ мулоқотда маълум қилинди.
Анжуманда таъкидланишича, Tashkent City халқаро ишбилармонлик маркази ҳудудида қурилаётган йирик лойиҳа — 215 метрдан ортиқроқ баландликка эга осмонўпар бино, яъни тўртинчи лот иншоотини барпо этиш ишларини Murad Buildings ва Туркиянинг Ozguven қурувчилик компаниялари амалга оширмоқда. Яқин вақт ичида 1,5 гектар ҳудудида қаддини ростлайдиган иншоотнинг расмий номини 2019 йилнинг август ойи ўртасида эълон қилиш режалаштирилган.
Журналистлар билан мулоқотда Murad Buildings компанияси раҳбари Мурод Назаров бинони барпо этишда Ozguven каби ишончли ҳамкор топилганидан мамнунлигини билдирди.
«Икки йилдан буён катта лойиҳани юксак даражада рўёбга чиқариш истаги билан ишлаб келмоқдамиз. Эндиликда катта орзуни амалга ошириш учун биргаликда ҳаракат қилмоқдамиз. Биз шаҳар қалбидан муносиб ўрин эгаллайдиган, унинг қоқ марказида қад ростлайдиган, замонавий ва инновацион меъморчилик ечимларини ўзида мужассам этган иншоот барпо қилмоқдамиз», – деди Murad Buildings компанияси раҳбари.
«Президентимиз мамлакатнинг ривожланиши борасида ўзининг ёрқин қарашлари билан кўплаб инсонларни, жумладан, бизни илҳомлантиришда давом этмоқда. Ушбу кўтаринки руҳ бизга Tashkent City’нинг халқаро лойиҳасида иштирок этиш фурсатини яратиб берди. Биз деярли икки йил давомида ушбу лойиҳа устида катта иштиёқ билан ва ушбу лойиҳани энг юксак тарзда амалга ошириш истаги билан ишлаб келмоқдамиз», — деди Назаров.
Ozguven қурувчилик компанияси раҳбари Ўзгур Ўзгувенннинг маълум қилишича, бино лойиҳаси учун туркиялик тажрибали мутахассислар тавсиялари инобатга олинган бўлиб, бу каби улкан бунёдкорлик ишларига жуда катта ҳажмдаги қурилиш материаллари ишлатилади.
«Биз Марказий Осиё ва Буюк Ипак Йўли марказида жойлашган ушбу лойиҳада иштирок эта олаётганимиздан жуда ҳам бахтиёрмиз. Биз ўз ноу-хауларимизни қўллашдан ташқари, Туркиянинг йирик университетларидан машҳур олим ва профессорларни жалб қилиб, уларнинг мутахассис сифатидаги маслаҳатларини амалиётга тадбиқ этдик. Архитектура ва муҳандислик нуқтаи назаридан жуда батафсил тадқиқот ва лойиҳалаштириш ишлари олиб борилди. Бинонинг қурилиши жараёнида гранитдан мустаҳкамроқ бўлган М700 бетон тури ишлатилади. Биргина пойдевор учун қуйиладиган бетондан ҳар бири 80 квадрат метрга тенг 700 та хонадон қуриш мумкин бўларди. Бутун объэкт учун ишлатиладиган бетондан эса 5000 та бундай хонадонларни қуриш мумкин. Агар қурилишда ишлатиладиган барча метал арматурани бир бири билан кетма кет улаганда, уларнинг умумий узунлиги 7,5 минг километрни ташкил этади. Бу Tashkent City’дан Истанбулгача бўлган масофадан кўпроқ. Ушбу миқдордаги металдан 25 мингта нуфузли автомобиль ишлаб чиқарилиши ҳам мумкин эди», — деди Ўзгур Ўзгувен.
Туркиялик ишбилармон Ўзгур Ўзгувен аждодларининг тарихий ватани – ота юртида амалга оширилаётган бунёдкорлик лойиҳасида қатнашаётганидан мамнун эканлигини қўшимча қилди.
Реклама ҳуқуқи асосида.
Изоҳ (0)