Дунёнинг сайёҳлар энг кўп ташриф буюрадиган давлатлари ҳақида биласизми?

«Дарё» колумнисти Ғайрат Йўлдош ўтган йилнинг энг кўп сайёҳларни жалб қилган мамлакатлари ҳақида ҳикоя қилади.

1. Франция

Бу мамлакатга 2018 йилда 93,2 миллион сайёҳ келган.

Сайёҳлик тизимидан келадиган фойда Франция ялпи ички маҳсулоти ҳажмининг 9 фоизини ташкил этади. Бу мамлакатда сайёҳлик соҳасида бугун 3 миллион киши меҳнат қилмоқда. Мамлакатдаги объектлар бўйича энг кўп сайёҳ Эйфел минорасига ташриф буюради.

2. Испания

Бу мамлакатга 2018 йилда 82,8 миллион сайёҳ ташриф буюрган.

Сайёҳлик соҳасидан келадиган фойда бу мамлакат ЯИМ ҳажмининг 14,4 фоизини ташкил этади.

Бу мамлакатда Барселона ва Мадрид шаҳарлари сайёҳлар энг кўп ташриф буюрадиган шаҳарлар ҳисобланади. Шунингдек, Ўрта Ер денгизидаги ороллар ва қирғоқларидаги дам олиш масканлари йил давомида сайёҳлар билан говжум бўлади.

3. АҚШ

Бу мамлакатга 2018 йилда 82,2 миллион сайёҳ ташриф буюрган.

Сайёҳларни кўпроқ Лас-Вегас, Нью-Йорк шаҳарлари, Гавайи оролларидаги дам олиш масканлари жалб этади.

АҚШга бораётган сайёҳ албатта Нью-Йоркдаги Озодлик ҳайкалини бир бор кўришга ҳаракат қилади. Шунингдек, Флорида соҳилларидаги дам олиш масканлари ҳам хорижлик сайёҳлар кўп ташриф буюрадиган жойлар ҳисобланади.

4. Хитой

Бу мамлакатга 2018 йилда 62,9 миллион сайёҳ ташриф буюрган.

Бу мамлакатда сайёҳларни энг кўп жалб қилган объэкт бу Буюк Хитой деворидир.

Шунингдек, Тибет ҳам сайёҳларни жалб қилишда муҳим ҳудуд ҳисобланади.

5. Италия

Бу мамлакатга 2018 йилда 62,1 миллион сайёҳ ташриф буюрган.

Сайёҳлик тизимидан олинган фойда мамлакат ЯИМ ҳажмининг 11 фоизини ташкил этади. Сайёҳларни бу мамлакатда кўпроқ Рим, Милан, Венеция шаҳарлари жалб қилган. Италияга ташриф буюрган ҳар бир сайёҳ антик даврдан қолган Римдаги Колизей биносини бориб кўришга ҳаракат қилади.

6. Туркия

2018 йилда бу мамлакатга 45,8 миллион сайёҳ ташриф буюрган.

Сайёҳлик тизимидан келадиган фойда бу мамлакат ЯИМининг 12 фоизини ташкил этади.

Бу мамлакат сайёҳларни ўзининг антик ва ўрта аср ислом маданиятидан сақланиб қолган ноёб осори атиқалари ва Ўрта Ер денгизидаги дам олиш масканлари билан жалб қилган. Мисол ўрнида, аҳолиси 2,5 миллион бўлган Анталя вилоятида дам олиш масканларига йилнинг биринчи чорагини ўзида 3 миллионга яқин хорижлик дам олувчи сайёҳлар келган.

7. Мексика

2018 йилда бу мамлакатга 41,4 миллион сайёҳ ташриф буюрган. Бу мамлакатга ташриф буюрадиган сайёҳларнинг асосий қисмини америкалик ва канадалик сайёҳлар ташкил этади. Бу мамлакат сайёҳларни мамлакат бўйлаб ўтказиладиган карнаваллари, шунингдек, Атлантика ва Тинч океани қирғоқларидаги кўплаб дам олиш масканлари билан жалб этади.

8. Германия

2018 йилда бу мамлакатга 38,9 миллион сайёҳ келган.

Бу мамлакатда сайёҳларни энг кўп жалб этаётган жой Берлин шаҳридир. Бу шаҳардаги машҳур Берлин деворини кўргани ҳар йили миллионлаб сайёҳлар ташриф буюради. Ушбу девор Иккинчи жаҳон урушидан кейин Германияни иккига бўлганлар томонидан Берлин шаҳри ҳам иккига бўлиниб, ўртасидан тортилган, шаҳар Ғарбий Берлин ва Шарқий Берлинга ажратилган эди. Ушбу девор 1989 йилда йиқитилиб, воқеалар Германиянинг бирлашиши билан тугади.

9. Таиланд

2018 йилда бу мамлакатга 38,3 миллион сайёҳ келди.

Сайёҳлик тизимидан келадиган фойда мамлакат ЯИМининг 15–20 фоизини ташкил этади. Сайёҳлар бу мамлакатга кўпроқ денгиз пляжларида дам олиш ҳамда Таиланднинг ўзига хос тарихий бинолари ва осори атиқаларини томоша қилиш учун келади.

10. Буюк Британия

2018 йилда бу мамлакатга 35,1 миллион сайёҳ ташриф буюрган.

Сайёҳлик тизимидан келадиган фойда бу мамлакат ЯИМининг 9 фоизини ташкил этади. Мамлакатда 3 миллион киши сайёҳлик тизимида ишлайди.

Бу мамлакатда сайёҳларни кўпроқ жалб қиладиган жой бу Лондон шаҳридир. Сайёҳлар Лондондаги кўплаб тарихий биноларни, диққатга сазовор жойларни томоша қилиш учун келади.

Рейтингнинг 11-20 ўринлари қўйидагича бўлган:

11. Япония – 31,2 миллион;

12. Австрия – 30,8 миллион;

13. Греция – 30,1 миллион;

14. Гонконг – 29,3 миллион;

15. Майлайзия – 25,8 миллион;

16. Россия – 24,6 миллион;

17. Канада – 21,2 миллион;

18. Португалия – 21,2 миллион;

19. Голландия – 19 миллион;

20. Макао – 18,5 миллион.

Россия 2018 йилда сайёҳлар ташрифи бўйича 16-ўринни эгаллади; бу давлатга 2018 йилда 24,6 миллион сайёҳ ташриф буюрган.

Шуни таъкидлаш лозимки, Россия дунё сайёҳларини кўп ҳам ўзига жалб қила олмайдиган мамлакат ҳисобланади. 2018 йилдаги рейтингда бу давлатнинг 24,6 миллион сайёҳ билан 16-ўринда тургани сабаби, 2018 йилда бу мамлакатда футбол бўйича навбатдаги жаҳон чемпионати бўлиб ўтди ва ушбу мусобақа Россияга келадиган сайёҳлар оқимини сезиларли кўпайтирди.

Бутунжаҳон сайёҳлик ташкилоти (UWNTO) маълумотларига кўра, 2018 йилда дунё бўйлаб 1.4 миллард киши саёҳат қилган.