Тошкент метроси Қорақамиш, ТТЗ ва Отчопаргача узайтирилиши мумкин

Ўзбекистон Президенти Шавкат Мирзиёев Тошкент метрополитенини ривожлантириш истиқболлари билан танишди. «Газета.uz»нинг «Ўзбекистон 24» телеканалига асосланиб хабар беришича, мутахассислар учта ерости метро йўлини охиригача қуриб битказишни ва 12 та янги станция қуришни таклиф қилди.

Лойиҳа билан учта ерости метро йўлини давом эттириш — «Ўзбекистон» линиясини «Беруний» бекатидан Қорақамиш томон (иккита янги станция), «Чилонзор» линиясини «Буюк Ипак йўли» бекатидан Тошкент трактор заводи томони (учта янги станция), шунингдек, «Юнусобод» линиясини «Мингўрик» станциясидан Отчопар томон (еттита янги станция) узайтириш таклиф қилинган.

«Президент ушбу барча йўналишлар бўйича йўловчилар оқимини атрофлича ўрганиб чиқиш, барча хизматларга шаҳар автобус ҳаракатини янги қурилаётган метрополитен бекатлари билан кесишув имкониятларини кўриб чиқиш ва келгусида ер усти метро йўли қурилишининг иккинчи босқичи ҳақида ахборот бериш ҳақида топшириқ берди», — деди «Боштранслойиҳа» институти бош директори Рустам Рўзиев.

Давлат раҳбари ер усти ҳалқа метро йўли қурилиши билан ҳам танишган. Уни қуриш 422,3 миллион долларга баҳоланмоқда. 1 июнь ҳолатига кўра қарийб 439 миллиард доллар (51,2 миллион доллар) ўзлаштирилган, улардан 374,5 миллиард сўм (43,6 миллион доллар) қурилиш-монтаж ишларига сарфланган.

Ер усти ҳалқа метро йўлининг узунлиги 52,1 километрни ташкил этади. Электропоезд ушбу масофани 1 соат 10 дақиқа ичида тўлиқ босиб ўтади. Режа бўйича, поезднинг ўртача тезлиги соатига 40 километрни, энг юқори тезлиги эса 80 километрни ташкил этади.

Ҳалқа метро йўли бўйлаб 35 та станция қурилади. Электропоездларга сервис хизматини кўрсатиш учун иккита электродепо ва техник кўрикдан ўтказиш шохобчаси ташкил этилади. 2017 йилда бошланган ушбу лойиҳа 2021 йилда тўлиқ фойдаланишга топширилиши керак.

Ер усти ҳалқа метро йўлини қуриш лойиҳасининг биринчи босқичида «Дўстлик» (собиқ «Чкалов») бекатидан Қўйлиққача саккизта станция қурилади. Кейинчалик линия «Олмазор», «Беруний», «Бодомзор» ва янги қурилаётган «Тузел» станцияларни бирлаштириб, ўзига хос ҳалқа ҳосил қилади.

Ер усти ҳалқа метро йўли Тошкентнинг Яшнобод, Учтепа, Олмазор, Юнусобод, Чилонзор ва Сергели туманларидан ўтади.