Бугун, 28 июнь куни Ахборот ва оммавий коммуникациялар агентлигида Ўзбекистоннинг нефть-газ сиёсати муаммолари ва истиқболлари, шунингдек, аҳолини энергия манбалари билан таъминлаш мавзусида матбуот анжумани бўлиб ўтди, деб хабар берди «Дарё» мухбири Севара Нишонова.
Тадбирда Энергетика вазирлиги томонидан амалга оширилаётган, режалаштирилаётган ишлар билан бирга соҳадаги муаммолар ҳақида ҳам маълумот берилди.
«Биз геологик қидирув ишларини ўз вақтида молиялаштириш, захираларимизни ўстиришга етарлича эътибор бермаяпмиз. Шунинг ҳисобига бугун газ қазиб олишдаги муаммоларга дуч келмоқдамиз. Энг асосий муаммо — ҳозирда конларимиз жуда қийин аҳволда», — деди «Ўзбекнефтгаз» АЖ бошқарув раиси Баҳодир Сиддиқов.
«Жуда кўп танқидларга учраяпмиз, оммавий ахборот воситаларида ‘Нега ўзимизнинг газимизни ўзимизга бермаяпти’ деган саволларга тўқнаш келяпмиз. Бунда муҳим жиҳат шундаки, газ табиий ва миллий бойлигимиз бўлиш билан бирга, товар (маҳсулот) эканини эсдан чиқариб қўймаслигимиз керак. Яқинда Осиё тараққиёт банки экспертининг мақоласи чиқди, у ‘Энергетика тизимида газга товар сифатида муносабат шаклланмаса, бу тизимда ривожланиш бўлмайди’, деб ёзган эди. Буни жуда тўғри фикр деб ҳисоблайман. Чунки биз газдан фойдаланганда энергия тежамкорлигини, вақтида ҳисоб-китоб қилиш кераклигини эсдан чиқариб қўйяпмиз. Кўп истеъмолчиларимизда кранни бурасак, газ чиқиб келаверади деган қараш сингиб қолган», — дея сўзларини давом эттирди «Ўзбекнефтгаз» раҳбари.
Бахтиёр Сиддиқов мавжуд муаммоларни бартараф этиш учун амалга оширилаётган ишларга ҳам тўхталиб ўтди:
«Шу муаммоларнинг олдини олиш мақсадида автоматлаштирилган тизимни жорий этиш бўйича катта музокаралар олиб борилмоқда. Уч йил давомида республикамиздаги барча аҳоли қатламини, истеъмолчиларни автоматлаштирилган тизимга ўтказамиз. Бу шаффофликни, истеъмолчи ва газ етказиб берувчи ўртасидаги муносабатларнинг очиқлигини таъминлайди. Ўйлайманки, мазкур лойиҳа аҳолининг газ истеъмолини ҳам тартибга солади».
Изоҳ (0)