Юлдуз Усмонованинг Гулнора Каримова тарафдорларига мурожаати, Тошкент метросига тушиб кетган йигит, «Бектўпи» бозоридаги ёнғин ва куннинг бошқа хабарлари
27 июннинг эътиборга молик янгиликлари — «Дарё» дайжестида.
Юлдуз Усмонова Гулнора Каримовани қўллаб-қувватлаган хонандаларни танқид қилди.
Ўзбекистон халқ артисти Юлдуз Усмонова ўзининг Instagram саҳифасига Гулнора Каримовани қўллаб-қувватлаётган ва унга озодлик сўраётган хонандаларни танқид қилган видеосини жойлади.
***
«Беруний» метро бекатида 28 ёшли йигит рельсга йиқилиб кетди.
Воқеа 27 июнь куни соат 9:20 ларда содир бўлган.
Шунга ўхшаш ҳолат 26 июнда тахминан соат 17:00 ларда «Ўзбекистон» метро бекатида ҳам юз берган эди.
***
Тошкентдаги «Бектўпи» бозори омборида ёнғин юз берди.
Қурбонлар ва жабрланганлар йўқ. Ёнғин натижасида 200 кв. м майдондаги омбор ва у ерда сақланган маҳсулотлар (обойлар, ламинат) ёниб кетган.
***
Молия вазирлиги Гулнора Каримова томонидан давлат фойдасига 1,2 млрд доллар ўтказилганини тасдиқламади.
Давлат бюджетига ундирилган маблағларнинг фуқаролар кесимидаги ҳисоби Молия вазирлиги томонидан юритилмайди. Бунда ўтган йили ва жорий йилнинг биринчи ярмида кўрсатилган миқдорда маблағлар бюджетга келиб тушмади, дейилади хабарда.
Аввалроқ Гулнора Каримова қизи Имон орқали «Ўзбекистон ҳудудидаги 1,2 миллиард доллар миқдоридаги шахсий активларим менга тегишлиликдан чиққани ва республика бюджети учун ишлаётганини билдирмоқчиман. Бу ҳолат бир неча маҳаллий текширувлар давомида ўз тасдиғини топган», — дея баёнот тарқатган эди.
***
Олий суд Рашид Қодиров шериклари ичида энг кам қамоқ муддатини олгани сабабини тушунтирди.
Суднинг ҳукми билан айбли деб топилган жиноятлари учун Рашиджон Қодировга, ЖК 50-моддасининг 6-қисми тартибида 10 йил озодликдан маҳрум қилиш ва энг кам ойлик иш ҳақининг 500 баравари миқдорида жарима жазоси тайинланди. Шунингдек, У. Суннатов 19 йилга, А. Мирзаев 15 йилга, У. Хуррамов 14 йилга, Ж. Файзиев 13 йилга, Л. Мусашайхов 13 йилга озодликдан маҳрум қилинган эди.
