Андижон шаҳри ва Хўжаобод туманида «Намунали ҳудуд» тажрибасини яратиш, шунингдек фуқароларнинг хавфсизлиги ва осойишталигини таъминлаш мақсадида ички ишлар ходимлари томонидан шаҳар ва туманларда «Тиғ» профилактик тадбирлари ўтказилмоқда. Бу ҳақда «Дарё»га вилоят ИИБ матбуот хизмати хабар бермоқда.
Вилоят ИИБ матбуот хизматининг ёзишича, турли тиғли буюмлар олиб қўйилиши ўз навбатида тан жароҳати билан боғлиқ жиноятларнинг олди олинишига хизмат қилмоқда.
Ушбу тадбир доирасида 1—20 июнь кунлари фуқаролардан Андижон шаҳрида хизмат олиб борувчи профилактика инспекторлари томонидан 94 та, ИИБ Патруль-пост хизмати ходимлари томонидан эса 71 та ўткир тиғли предмет олинган.
«Бемақсад ёнида ўткир тиғли жисмлар кўтариб юрган шахслар билан профилактик суҳбатлар ўтказилиб, шу куннинг ўзида уларнинг ота-оналари ва кенг жамоатчилик иштирокида муҳокама йиғилишлари ўтказилган. Ёшларнинг ўткир тиғли жисмларни ёнида олиб юришлари уларнинг ожизлигини кўрсатиши, бунинг оқибати эса аянчли ҳолатлар билан якунланиши мумкинлиги таъсирчан усулларда кенг жамоатчиликка тушунтириб борилмоқда», — дейилади вилоят ИИБ матбуот хизмати хабарида.
Изоҳ (0)