Inson resurslarini tadqiq qilish sohasida dunyodagi eng yirik konsalting tashkilot — Mercer kompaniyasi hisobotiga ko‘ra, Toshkent ekspatlar (ekspatriant — chet ellik ishchi yoki korxonaning chet elda ishlaydigan xodimi) uchun dunyoda eng arzon shahar deb hisoblanmaydigan bo‘ldi. Bu haqda Spot xabar berdi.
Tadqiqot 25 yildan buyon olib borilayotgan bo‘lib, 209 ta shaharni qamrab oladi va o‘z xodimlarini chet elda ishlashga yuborayotgan kompaniyalar xarajatlarni to‘g‘ri hisoblashi uchun mo‘ljallangan.
Mezonlar sifatida yashash narxi ko‘rib chiqilgan, taqqoslash uchun tayanch shahar sifatida Nyu-York, valyuta sifatida AQSh dollari olingan. Bundan tashqari, transport va kiyim-kechakdan tortib uy uchun mahsulotlar va ko‘ngilochar mashg‘ulotlargacha bo‘lgan 200 dan ortiq buyumlar bahosi ko‘rib chiqilgan.
Ekspatlar uchun eng qimmat shaharlar reytingida Gonkong yetakchilikni saqlab qoldi. Ikkinchi o‘rinda — Tokio, uchinchi o‘rinda — Singapur. Birinchi o‘ntalikka shuningdek, Seul, Syurix, Shanxay, Ashxobod, Pekin, Nyu-York, Shenjen kiritildi.
Toshkent ekspatlar uchun dunyoda eng arzon shahar nomini Tunisga bo‘shatib berdi. O‘ntalikdan, shuningdek, Karachi, Bishkek, Banjul, Vindxuk Islomobod, Tbilisi va Skopye joy oldi. Tadqiqotda qayd etilishicha, ushbu shaharlardagi nufuzli hududlarda oziq-ovqatdan tortib uy-joygacha barcha narsalar juda arzonligicha qolmoqda.
Avvalroq Mercer yashash uchun eng yaxshi shaharlar reytingini e’lon qilgandi. Unda Toshkent 231 o‘rindan 201-o‘rinni olgandi.
Izoh (0)