«Тошкент» автовокзалига Хитойда ишлаб чиқарилган 68 та Yutong автобуси олиб келинди. Бу ҳақда ЎзА хабар бермоқда.
Давлат раҳбари ташаббуси билан «Тошкент» автовокзали тубдан реконструксия қилиниб, илғор технологиялар билан жиҳозланди. Меҳмонхона, она ва бола, тиббиёт хоналари, савдо дўконлари, аёллар ва эркаклар учун алоҳида намозхоналар ташкил этилди. 31 перрон ва 80 автобус учун жой мавжуд. Вокзалда бир вақтнинг ўзида 2 мингдан зиёд йўловчига хизмат кўрсатиш имконияти яратилди. Маҳаллий ва халқаро йўналишларда қатновлар йўлга қўйилди.
— Маҳаллий фуқаролар ва хорижлик сайёҳларга замонавий хизмат кўрсатиш, уларни манзилига хавфсиз ва қулай шароитларда етказишга алоҳида эътибор қаратаяпмиз, — дейди «Узаутотранс Service» компанияси бош директори Саидраҳим Икромов. – Шу мақсадда Хитойнинг Zhengzhou Yutong Bus компаниясида ишлаб чиқарилган 100 та автобус олиб келган эдик. Бугун улар қаторига яна 68 та қўшилди. 51 йўловчига мўлжалланган бу автобусларда йўловчилар учун барча қулайликлар бор. Юмшоқ ўриндиқлар тепасида ҳаво дефлектори, индивидуал ёритиш чироқлари, кондиционер, карнай жойлашган, телефонни қувватлаш қурилмаси мавжуд. Бу йўловчиларга жуда қўл келади. Уларнинг хавфсизлигини таъминлаш учун кузатув камералари ўрнатилган.
Таъкидланишича, ҳозирда «Тошкент» автовокзалидан Самарқанд, Бухоро, Янгиер, Зомин, Жиззах, Қарши, Қоракўл, Гагарин, Термиз, Урганч, Денов каби 11 шаҳарлараро ва Қозоғистоннинг Тараз, Туркистон, Ушкунур, Олмаота шаҳарларига халқаро йўналишларда мунтазам автобус қатновлари амалга оширилмоқда.
Тез кунларда Қирғизистон, Тожикистон, Россия ва Қозоғистоннинг яна бошқа шаҳарларига халқаро автобус қатновларини йўлга қўйиш режалаштирилган.
Изоҳ (0)