Молия вазирлиги томонидан «Солиқ ва божхона имтиёзлари берилишини янада тартибга солиш чора-тадбирлари тўғрисида»ги президент қарори лойиҳаси жамоатчилик муҳокамасига тақдим этилди, деб хабар берди Spot.
Унга кўра, жорий йилнинг 1 августидан бошлаб икки тоифадаги тадбиркорларни қўшилган қиймат солиғи (ҚҚС) тўловчилар ҳисобига киритиш режалаштирилмоқда.
Биринчиси бензин, дизел ёқилғиси ва газни ёқилғи қуйиш станциялари орқали охирги истеъмолчиларига сотадиган юридик шахслар.
Иккинчиси товарларни импорт қилувчи тадбиркорлик субъектлари. Уларнинг ҳар иккови сотишдаги тушум миқдоридан қатъи назар қўшилган қиймат солиғи тўловчилари деб ҳисоблаш режалаштирилмоқда.
Бунда, товарларни биринчи марта импорт қилувчи тадбиркорлик субъектлари импорт шартномаси тузилган ойдан кейинги ойнинг 1 санасидан бошлаб қўшилган қиймат солиғи тўловчиси сифатида ҳисобда туриши шарт.
Бундан ташқари, ягона ер солиғи тўловчиси ҳисобланган қишлоқ хўжалиги товарлари ишлаб чиқарувчилари шу санадан бошлаб ихтиёрий равишда қўшилган қиймат солиғини тўлашга ўтиши мумкин.
Шунингдек, календар йили давомида хизматларни реализация қилишдан олган тушуми 100 миллион сўмдан ошган, бироқ бир миллиард сўмдан кўп бўлмаган телекоммуникациялар операторлари ва (ёки) провайдерларига воситачилик хизматларини кўрсатувчи якка тартибдаги тадбиркорлар 1 августдан бошлаб хизмат ҳақи суммасидан 25 фоиз ставкада ягона солиқ тўловини тўлашга ўтади.
Изоҳ (0)