Ijtimoiy tarmoqlarda Tropikamid dori vositasini O‘zbekistonda savdosi taqiqlangan Tramadol, Lirika o‘rnini bosuvchi dori sifatida talqin etilayotgani Sog‘liqni saqlash vazirligi tomonidan o‘rganib chiqildi. Bu haqda vazirlikning Jamoatchilik bilan aloqalar bo‘limi ma’lum qildi.
Vazirlik rasmiy bayonotiga ko‘ra, Tropikamid dori vositasi ko‘zga tomizish uchun mo‘ljallangan bo‘lib, qorachiqlarni kengaytirish xususiyatiga ega, ko‘z kasalliklarida foydalaniladi.
Ushbu dori vositasi Sog‘liqni saqlash vazirligining 2018-yil 22-oktabrdagi “Retseptsiz beriladigan dori vositalari ro‘yxatini tasdiqlash to‘g‘risida”gi buyrug‘iga ko‘ra, shifokor retsepti asosida berilishi belgilangan.
Respublika ixtisoslashtirilgan ko‘z mikroxirurgiya ilmiy-amaliy tibbiyot markazi direktori Azamat Yusupovning aytishicha, undan qoidaga xilof ravishda foydalanib, inyeksiya qilinganda qon tomirlari kengayishi tufayli sarxushlik holati yuz beradi.
Ammo qayd etilishicha, Tropikamidni Lirika va Tramadol kabi psixotrop dori vositalari bilan tenglashtirib bo‘lmaydi. Tropikamidda narkotik moddalar mavjud emas. Ushbu dori vositasi retseptsiz berilsa, turli noxush vaziyatlar ehtimoli ko‘payishi mumkin. Shu sababli, Tropikamid faqatgina shifokor retsepti asosida berilishi shart.
Vazirlar Mahkamasining 2018-yil 27-oktabrdagi “Giyohvandlik vositalari, psixotrop moddalar va prekursorlarni O‘zbekiston Respublikasi hududiga olib kirish, undan olib chiqish va tranzit tarzida o‘tkazish tartibini, shuningdek, ularning muomalada bo‘lishi yuzasidan nazoratni takomillashtirish to‘g‘risida” 2015-yil 12-noyabrdagi qaroriga o‘zgartirishlar kiritish haqida”gi qarorida tasdiqlangan giyohvandlik vositalari, psixotrop moddalar va prekursorlar ro‘yxatlariga Tropikamid dori vositasi nomlanishi bo‘yicha kiritilmagan.
Shu bilan birga, BMTning 1961-yilgi giyohvandlik moddalari to‘g‘risidagi Yagona konvensiyasi va 1971-yilgi psixotrop moddalar to‘g‘risidagi konvensiyasi talablariga muvofiq tasdiqlangan giyohvandlik vositalari va psixotrop moddalar ro‘yxatlariga ham kiritilmagan.
“Tibbiyot amaliyotida ishlatishga ruxsat etilgan Tropikamid dori vositasi Davlat reyestridan ‘Midaks’, ‘Tropikamid’ nomlari bilan o‘tkazilgan. Ushbu dori vositasi bilan bog‘liq noqonuniy xatti-harakatlar yuz bergan holatlarda, Sog‘liqni saqlash vazirligiga huquq-tartibot organlari tomonidan kelib tushayotgan murojaatlar asosida, Narkotiklarni nazorat qilish Davlat komissiyasi tomonidanro‘yxatga kiritilishi to‘g‘risidagi masala ko‘rib chiqiladi”, — deyiladi xabarda.
Izoh (0)