Наманганда Француз альянси филиали ваколатхонаси очилди

Наманганда Исхоқхон Ибрат номидаги хорижий тилларга ихтисослаштирилган интернат-мактабида Тошкентдаги Француз альянси филиали ваколатхонаси очилди. Бу ҳақда «Дунё» ахборот агентлиги хабар берди.

Очилиш маросими 7—8 июнь кунлари ўтказилган Invest in Namangan форуми доирасида бўлиб ўтган, унда бош вазир ўринбосари Азиз Абдуҳакимов, Ўзбекистоннинг Франциядаги элчиси Сардор Рустамбоев, Тошкентдаги Француз альянси филиали раҳбари Шоазим Миноваров ва Наманган ҳокимлиги раҳбарияти иштирок этган.

Мактабда, шунингдек, лингофон хонаси, ва француз тили кутубхонаси ҳам очилган. Мактаб ўқувчилари учун француз ўқитувчилари иштирокида онлайн курслар ташкил этиш, шунингдек, француз тили ўқитувчилари малакасини Францияда ва Тошкентдаги Француз альянси филиалида ошириш режалаштирилган.

Француз альянси Тошкентда 2015 йилнинг ёзида очилган бўлиб, француз тилини ўргатиш юзасидан фаолият олиб боради.