Фуқаролик ишлари бўйича Тайлоқ туманлараро судининг суд ҳужжатига асосан уч нафар фарзанднинг моддий таъминоти учун алимент пуллари қарздор отадан унинг Lacetti машинасини сотиш орқали ундириб берилди
Zarnews’нинг ёзишича, қарздор Н.Ғ.нинг номида пул маблағлари, валюта ҳисобрақамлари ва қимматли қоғозлари ҳамда автомототраспорт воситалари бор-йўқлигини аниқлаш мақсадида «Суд ҳужжатлари ва бошқа органлар ҳужжатларини ижро этиш тўғрисида»ги Қонуннинг 87-моддасига асосан тегишли тартибда мутассадди ташкилотларга сўров хатлари юборилган. Сўровлар натижасида қарздорнинг номида 2009 йилда ишлаб чиқарилган Lacetti машинаси борлиги аниқланган.
Давлат ижрочилари томонидан қарздор Н.Ғ.нинг номида бўлган ушбу машина хатланиб, жарима майдончасига сақлаш учун топширилган. Машина «Электрон баҳолаш» масъулияти чекланган жамияти томонидан 56 миллион 857 минг сўмга баҳоланиб, «E-ijro аукцион» ягона электрон савдо майдончасига сотувга чиқарилган.
Қарздорнинг алиментдан бўлган қарздорлиги жами 37 миллион 920 минг сўмни ташкил қилган. Сотувдан тушган пул маблағларидан ундирувчи З.М.нинг пластик картасига 37 миллион 920 минг сўм алимент пуллари ўтказиб берилган.
Изоҳ (0)