Ўзбекистонда Equinox, Тrailblazer ва Traverse ишлаб чиқариш шу йилнинг охирида йўлга қўйилади

GM Uzbekistan премиум сегментда Chevrolet Equinox кроссоверини, Chevrolet Trailblazer йўлтанламас ва Chevrolet Traverse оилавий кроссоверини ишлаб чиқаришни жорий йилнинг охиригача бошлашни режалаштирмоқда. Бу ҳақда «Podrobno.uz» хабар берди.

«Шу йилнинг охирида, эҳтимол декабрда ёки кейинги йилнинг бошида 3 та янги модель ишлаб чиқариш йўлга қўйилади. Уларнинг ҳажми кам бўлади. Биз талабдан келиб чиқиб, иш тутамиз. Сотиб олинмайдиган минглаб Тrailblazer ишлаб чиқаришнинг нима кераги бор? Бозорга қанча машина керак бўлса, шунча чиқарамиз», — дейди «Ўзавтосаноат» стратегиc ривожлантириш бўлими бошлиғи Рустам Қодиров.

Унинг айтишича, умуман олганда премиум сегмент катта талабга эга эмас, ҳатто автоконцерн умумий ҳажмининг 10 фоизи ҳам эмас, чунки ҳамманинг ҳам бундай автомобиль сотиб олишга қурби етмайди. Бугунги кунда Ўзбекистонда фақат синов ўтказиш ва ўрганиш учун 3 та мана шундай модель олиб келинган.

Шу билан бирга, таъкидлаш жоизки, GM Uzbekistan келгуси йилларда бюджет сегментида янги автомобилни тақдим этиш ниятида.