21 ёшли америкалик қиз дунёнинг барча мамлакатларини айланиб чиққан энг ёш инсонга айланди
Жорий йилнинг 31 май куни 21 ёшли америкалик Лекси Алфорд Шимолий Кореяда бўлиб, ушбу мамлакатга келган тарихдаги энг ёш инсонга айланди. Бундан ташқари у дунёнинг барча мамлакатларида бўлган 24 ёшли қизнинг Гиннес рекордлар китобидаги ўрнини ҳам эгаллади, деб хабар беради Forum Daily.
Калифорниядаги туристик агентликка эгалик қилувчи оилада улғайган Алфорд дунёнинг 196 та суверен давлатида бўлиб қайтди.
«Аввалига шунчаки дунёни айланиб, ўз дунёқарашимни ўзгартирмоқчи эдим. Ҳаммаси ҳақиқатда қийинлашганидан кейин, қилаётган ишларим ёш аёлларга ғайрат улашаётганини билиб қолганимдан сўнг бошланди. Бу каби қўллаб-қувватлов таслим бўлмасдан, олға интилишимга ёрдам берди», — дейди Алфорд.
2016 йили Алфорд ўз миссияси — 196 та суверен давлатда бўлиб, Гиннеснинг рекордлар китобига кириш устида қаттиқ ишлашни бошлайди. Унга қадар ушбу рекорд 2013 йилда 24 ёшли Жеймс Асквит томонидан ўрнатилган эди.
«12 ёшимдан буён йиғиб келган пулларим саёҳатимнинг дастлабки бир ярим йилига етди. Энг мақбул таклифларни қидириш, рейсларим учун балл ва мил тўплаш йўлларини олдиндан қидираман. Одамлар боришни истамаган давлатлар менда кўпроқ қизиқиш уйғотади. Покистон ва Венесуэлага ўхшаш мамлакатларда мен бошқа ерда учратмаган одамийлик меҳри ва табиат гўзаллигини кўрдим», — дейди саёҳатчи.
Унинг сўзларига кўра, виза жараёнларининг қийинлиги, туристик инфратузилманинг пастлиги, хавфсиз саёҳатнинг қимматлиги сабаб Ғарбий ва Марказий Африка мамлакатларига боришда муаммолар юзага келган.
Бундан ташқари Алфорд бир неча ойлик уринишлардан сўнг Шимолий Кореяга ташриф буюришга ҳам муваффақ бўлган. «Тўғрисини айтганда, сиёсий муаммолар сабаб мамлакатни яхши томоша қила олмади. Бироқ америкаликларга нисбатан тақиқ олиб ташлангач, яна бир бор у ерга бораман», — дейди қиз.
