Қоракўлда бир гуруҳ ёшлар томонидан икки кун давом этган безорилик ҳаракатлари ёш йигитнинг ўлдирилиши билан якун топган ва қотилга нисбатан 10 йил 6 ой муддатга озодликдан маҳрум этиш жазоси қўлланилган. Бу ҳақда Жиноят ишлари бўйича Қоракўл туман суди раиси Жалол Садиров маълум қилди.
Ҳодиса 2018 йил октябрида содир бўлган. Қоракўл тумани фуқаролари 1991 йилда туғилган Асрор Искандаров ҳамда 1997 йилда туғилган Ботир Жумаевлар Навоий шаҳридан меҳмон бўлиб келган Моҳир Толибов ва унинг қоракўллик дўсти Азизбек Баҳодиров билан туман марказидаги кафелардан бирида тамадди қилган. Арзимас сабаб билан чиққан жанжал оқибатида йигитлар ўртасида тўполон бошланган. Бир-бирини беҳаё сўзлар билан ҳақоратлаган, дўппослаган. Эртаси куни жанжалга қоракўллик Озод Музаффаров, Шавкат Раҳимов ва Улуғбек Аҳмедов каби ёшлар ҳам аралашган. Безорилик ҳаракатларини авж олдиришган ва тарқалишган.
Бироқ иккинчи кун кеч тушгач, Моҳир Толибов, Азизбек Баҳодиров, Озод Музаффаров, Шавкат Раҳимов ҳамда Улуғбек Аҳмедовлар орани очиқ қилиш мақсадида тенгқурлари Асрор Искандаровнинг хонадонига келган. Асрор Искандаров улар билан дарвоза олдида яна дўппослашиб, жанжал кўтарган. Жанжал чоғида Асрор зудлик билан яшаш уйидан мол сўйишга мўлжалланган ўткир тиғли пичоқни олиб чиққан ва қаршисидан чиққан Улуғбек Аҳмедовнинг инсон ҳаёти учун муҳим бўлган чап ўпка соҳасидан пичоқлаб, уни қасддан ўлдирган.
2019 йил 22 май куни Жиноят ишлари бўйича Қоракўл туман суди томонидан Асрор Искандаров Жиноят кодексининг 97-моддаси 1-қисми (қасддан одам ўлдириш) ҳамда Жиноят Кодексининг 277-моддаси (безорилик) билан айбли, деб топилган. Унга нисбатан узил-кесил 10 йил 6 ой муддатга озодликдан маҳрум қилиш жазоси қўлланилган.
Шунингдек, Ботир Жумаев, Моҳир Толибов, Азизбек Баҳодиров, Озод Музаффаров ҳамда Шавкат Раҳимовлар Жиноят Кодексининг 277-моддаси (безорилик) билан айбланган. Уларнинг ҳар бири 3 йил муддатга озодликни чеклаш жазосига ҳукм этилган.
Изоҳ (0)