Т.Йўлдошева судга мурожаат қилиб, жавобгарлар Термиз шаҳар ҳокимлиги ва фуқаро Р.Жўраевга нисбатан Термиз шаҳар ҳокимининг 2018 йил 24 апрелдаги ва 2018 йил 1 июнь кунги қарорларини ҳақиқий эмас деб топишни сўради. Бу ҳақда Олий суд матбуот хизмати хабар бермоқда.
Суд мажлисида аниқланишича, Т.Йўлдошева 2010 йилда Ш.Жўраев билан турмуш қурган. Турмушлари давомида 3 нафар фарзанд кўришган. Термиз шаҳар ҳокимининг қарорига асосан турмуш ўртоғи Ш.Жўраевнинг номига «Янги давр» кўчасидан ажратилган 500 квадрат метр ерга уй-жой қуриб, 2017 йил охирида кўчиб ўтишади.
Шаҳар ҳокимлиги Ш.Жўраев номига мулк ҳуқуқи беради.
2018 йил апрель ойида эр-хотин ўртасида низо пайдо бўлади. Шунда турмуш ўртоғи янги қурилган уйни қайин акаси Р.Жўраев номига ўтказиб, бошқа фуқарога сотиб юборади.
Судда жавобгар даъвони тан олмасдан турли важларни келтирди. Яъни, Ш.Жўраев уйлари бир қисмининг бузилгани эвазига 2013 йилда ўзини номига берилган ер участкасига уй қуриб, хотини розилиги билан уйни сотганлигини баён қилди.
Акаси Р.Жўраевга ер ажратилмай қолганлиги учун 2016 йилда шаҳар ҳокимлиги томонидан ўзига яна 500 квадрат метр ер ажратилганлиги, ушбу ерга акаси уй қурганлиги, низо бўлмагани ва ер майдони ўзининг номига ажратилгани учун қурилган уй-жойга Термиз шаҳар ҳокимининг қарорига асосан ўзининг мулк ҳуқуқи белгиланган.
Шаҳар ҳокимлиги илгари ҳам унга ер ажратиб берган. Ҳокимнинг 2016 йилдаги ер ажратиш қарорларига ўзини ўрнига акаси Р.Жўраевнинг фамилиясини қўйиб ўзгартиш киритиш ҳақида ариза билан мурожаат қилган, аризаси қаноатлантирилган.
Шаҳар ҳокимлиги вакили М.Йўлдошев маъмурият томонидан Ш.Жўраевнинг аризаси кўриб чиқилиб, шаҳар ҳокимининг 2018 йил 25 майда қарори қабул қилиниб, 2016 йил 30 декабрдаги қарори 1-бандидаги «Жўраев Шуҳрат» сўзлари «Жўраев Рустам» деб ўқилиши, шунингдек, 2018 йил 1 июндаги қарорга кўра, «Янги давр» кўчаси, 5-бурилиш, 1-уйга Р.Жщраев номига мулк ҳуқуқи эътироф этилганлигини билдирди.
Термиз шаҳар ҳокимининг 2018 йил 24 майдаги қарори билан ҳокимнинг 2016 йил 30 декабрдаги қарори иловасининг 1-бандига ўзгартиш киритилиб, 2018 йил 13 апрелдаги қарорни бекор қилиш, 2060-сонли қарор 1-бандидаги 318-иловаси «Жўраев Шухрат» сўзлари «Жўраев Рустам» деб ўқилиши белгиланган.
Шаҳар ҳокимининг 2018 йил 1 июндаги қарори билан ишчи гуруҳ комиссияси 2018 йил 28 майдаги баённомаси тасдиқланиб, фуқаро Р.Жўраевга кўрсатилган уй-жойга мулк ҳуқуқи берилган.
Оила Кодексининг 23-моддаси 1-қисмига кўра, эр ва хотиннинг никоҳ давомида орттирган мол-мулклари, шунингдек, никоҳ қайд этилгунга қадар, бўлажак эр-хотиннинг умумий маблағлари ҳисобига олинган мол-мулклари, агар қонун ёки никоҳ шартномасида бошқача ҳол кўрсатилмаган бўлса, уларнинг биргаликдаги умумий мулки ҳисобланади.
Бироқ, Термиз шаҳар ҳокимлиги масъул шахслари шаҳар ҳокимлиги қарорига ўзгартиш киритаётган вақтларида Ш.Жўраев ва Т.Йўлдошевалар умумий мулки бўлган «Янги давр» кўчаси, 5-бурилиш 1-уйга Р.Жўраевнинг мулк ҳуқуқини белгилаш жараёнида Т.Йўлдошеванинг розилигини олиш чорасини кўрмаган.
Низоли уй-жойга Р.Жўраевнинг эгалиги асоссиз белгиланиши натижасида ушбу уй-жой Р.Жўраев томонидан 2018 йил 2 август кунги нотариал тартибда тасдиқланган олди-сотди шартномасига асосан фуқаро Ғ.Холиқовга сотиб юборилган.
Судда аниқланган ҳолатлар Т.Йўлдошеванинг ҳуқуқ ва қонун билан қўриқланадиган манфаатлари бузилганлигини кўрсатади. Шу боис суд шикоят аризани қаноатлантирди ва Термиз шаҳар ҳокимининг қарорларини ҳақиқий эмас деб топди.
Изоҳ (0)