Тошкент вилоятидаги Чорвоқ сув омбори ҳудудида жойлашган дам олиш масканларида хизмат кўрсатаётган тадбиркорлар пляжларни ташкил этиш тартиб-қоидаларини қўпол равишда бузмоқда. Бу ҳақда Фавқулодда вазиятлар вазирлиги бошқарма бошлиғи Шуҳрат Дадахонов 30 май куни Миллий матбуот марказида ўтказилган анжуманда айтиб ўтди, дея хабар бермоқда «Дарё» мухбири Мусулмонбек Иброҳимов.
«Пляжларда амал қилиниши зарур бўлган тартиб-қоидалар ҳукумат қарори билан тасдиқлаб қўйилган. Минг афсуски, Чорвоқ сув омборидаги пляжларда тадбиркорлар хавфсизлик қоидаларига умуман риоя этмаяпти. Масалан, скутерларни масофа сақламай, белгиланмаган ҳудудда бошқариш ёки қайиқларда фуқароларни хавфсизлик нимчаларисиз сайр қилдириш каби қоидабузарликлар шулар жумласидан», — дейди бошқарма бошлиғи.
ФВВ масъул ходимининг маълум қилишича, ўз вақтида Чорвоқдаги дам олувчилардан бири скутерни тартибсиз бошқариб, ўзга бир шахснинг ўлимига сабаб бўлган.
«Дам олувчилардан бири скутерни тартибсиз бошқариб, сув ҳавзасида чўмилаётган бошқа бир фуқаронинг бошини ёриб юборган. Жабрланувчи олган тан жароҳатлари натижасида вафот этган. Афсуски, бу каби нохуш ҳолатлар кўплаб учрамоқда. Бунга баъзан инсон омили, аксарига мутасаддиларнинг ўз вазифаларига етарли эътибор қаратмаётгани сабаб бўлмоқда», — дея қўшимча қилди у.
Изоҳ (0)